Кияса ёросысь «Удмурт Кенеш»-лэн ёзэтэныз кивалтӥсе Людмила Коконова быръемын

23-тӥ коньывуонэ «Удмурт Кенеш» огазеяськонлэн Кияса ёросысь ёзэтэзлэн йылпумъянъёс лэсьтонъя но быръёнъёсъя конференциез ортчиз.

Ёзэтлэн кивалтӥсез Ольга Танаева 4 ар ӵоже лэсьтэм ужъёссы сярысь вераз. Та дыр ӵоже пӧртэм ужрадъёс, фестивальёс, пумиськонъёс трос гинэ ортчытэмын шуиз со. Кенешчиос озьы ик пусйизы, азьланяз егит анай-атайёс пӧлын удмурт кылэз вӧлмытон ужез азьланьтыны кулэ, огазеяськонэ егитъёсты кыскыны тыршоно, проектъёс бордын мыло-кыдо ужано шуыса.

Конференциын 4 арлы резолюция кутэмын, озьы ик выль Правление, Вань удмуртъёслэн 14-тӥ ӧтчамазы делегатъёс но Пичи кенеше ёзчиос быръемын. Быръемын на «Удмурт Кенеш»огазеяськемлэн Кияса ёросысь ёзэтэзлы выль кивалтӥсь но. Со луиз Людмила Коконова.

Со сяна, конференция улсын «Гурт адями — 2019» конкурслэн «Выжыоссэ утись» номинациын вормисез — Вуж Салья гуртысь Марина Моряковаез — данъязы.

Ивортон басьтэмын «Удмурт кенеш» огазеяськонлэн «Вконтакте» сайтысь огинысьтыз