«Киужъёсъя арня» ортчоз Удмуртиысь чеберлыко киужъёсъя йӧскалык центрын

    «киужъёсъя арня» ортчоз удмуртиысь чеберлыко киужъёсъя йӧскалык центрын 1

    Элькунысь устоосыз кибашлыос вералозы но возьматозы, кызьы лэсьтоно кызьпу туйлэсь пичи арбериосты, ибырвесьёсты, сӥньысъёслэсь суйпоскесъёсты но со выллем мукетсэ. Со сяна, ужалоз пӧраськон студизы, отын мылкыд карисьёс перепеч, кӧмеч лэсьтыны дышетскыны быгатозы.

    Алексей Кузнецовлэн верамезъя, мастер-классъёс ортчытӥськозы 5–6 адямилэсь гурппаос понна. Отчы пыриськон дунын, кутэм материалъёс понна 50 манет тыроно луоз, пӧраськонъя мастер-классын — 150 манет. Нош адӟытонэн, мастерскойёсын тодматскон понна дун тыроно ӧвӧл.

    Со сяна, быдэс арня ӵоже «этнографи часъёс» ортчылозы. 16-тӥ куартолэзе 10 часын истори тодосъя кандидат Людмила Молчанова лыктоз шуыса чаклало.

    «Нимысьтыз ӧтчам адямиос милемлы но, мылкыд карисьёслы но лыдӟозы лекциос. Кибашлыосын герӟаськем, ӧнеръёсын герӟаськем темаосъя. Кык тодосчи милям вань али, кин лыкытын быгатэмзэ вераз — со истори тодосъя кандидат, этнограф  Юрий Александрович Перевозчиков луыны кулэ но луоз Людмила Анатольевна Молчанова, со вералоз сюан костюмын символика сярысь», — вераз Алексей Кузнецов.

    Озьы ик юртлэн мастерскойёсаз лэьтэм удмурт крезьгуро инструментъёсын тодматыны чакламын — луозы крезь, кубыз, быз но шуланъёс.

    «Со милям малпамын котькуд нунал луоз шуыса. Адями трос люкаськиз ке, ми лэсьтом презентация. Нош озьы ми вожен-вожен шудыса улом, кин лыктоз адӟытонэз учкыны, соос быгатозы кылзыны», — ватсаз чеберлыко киужъёсъя центрлэн кивалтӥсезлэн воштӥсез.

    «Киужъёсъя арня» кӧснуналэ, 20-тӥ куартолэзе, сяме пырем «Киужъёсъя уй» ужрадэн йылпумъяськоз («Музейёслэн уйзы» ужрадлы сӥзьыса). Соку чеберлыко киужъёсъя центр 12 часысен 20 часозь усьтэмын луоз.

    http://udmurt.media/