«Кирень юон» фильм эшшо одӥгаз Росси вожвылъяськонын вормиз
«2016-тӥ арын та фильмен ик ми Марий Элын мукет конкурсэ пыриським, таяз арын Иркутске лэзимы, милемыз но ӧтё вал, но ми мыныны ӧм быгатэ, соин ик заочно лэзимы», — валэктӥз Ольга Мякишева.
«Кирень юон» фильмез Шаркан ёросысь Кельдыш гуртын лэсьтӥзы. Тодэ вайытом, отын возьматэмын, кызьы ортче уйпал удмуртъёслэн Быдӟым визянлэн нырысетӥ нуналэз. Коркалэн кузёез бускельёссэ куное ӧте, но киренен сюкасен утялтэ. Вакчи метръем кинолента бордын Ольга Мякишеваен ӵош ужазы оператор, куарая режиссёр но «Встреча» калык киностудилэн ёзчиосыз.
Лулчеберетъя ваньбурлыктэм кылёсбурлы сӥзем фильмъёсты лэсьтон бордын Мякишева 2003-тӥ арысен ужа. Солэн верамезъя, со дырысен трос картинаос кылдӥзы ни.
Одӥгез соос пӧлысь, 2015-тӥ арын Алнаш ёросын лэсьтэм «Пасхальный напев», режиссёрлы эшшо одӥг вормон вайиз. 29-тӥ куарусёнэ Сыктывкарын Финн-угор калыкъёслэн визуальной исскуствооссыя 5-тӥез «ТУЙВЕЖ» (сюрес вож) калыккуспо фестиваль йылпумъяськиз. «Устоез этнографи фильм» понна данъет сюрес вылын на ке но, Ольга Мякишеваез вормонэныз ӟечкылазы ни.
«Та конкурсын Удмуртия тужгес трос данъетъёс басьтӥз, со тужгес но шумпоттэ», — ватсаз режиссёр.