Кинолэн арезлы йылпумъянъёс лэсьтыса…

Котырес ӝӧк сьӧры люкаськизы пӧртэм вакытъёсысь адямиос. Со ӟуч киноосты удмурт кылэ дублировать карон бордын ужамъёс: режиссёр В. Ушаков, звукорежиссёр В. Михайлов, Удмурт театрысь артистъёс П. Романов, Г. Бекманов, писатель С. Карпов, Удмурт кун университетысь «Берыктон луд» клубысь егит берыктӥсьёс, егит сценарист Дарали Лели. Валаськиз: макем трос удмурт киноос лэсьтэмын, макем трос ӟуч киноос удмурт кылэ берыктылэмын вылэм кылем даурысь 80-тӥ-90-тӥ аръёсы.

— Огыр-бугыр вакыт вал, — вераз П. Романов. — Нуназе репетициос вискын мынӥськод студие дублировать карон бордын ужаны, ӝытазе — спектакль возьматыны, 10 часын ӝыт — нош ик студие. Араз 15-20 киноосты берыктылӥськом вал, 25 ар куспын та лыдпус ог 350 пала вуэ, дыр.

— Жаляса верано, 1990-тӥ аръёсы Госкино куашканы кутскиз, удмуртъёс, башкиръёс кадь, валаса но ӧз вуттэ, асьсэлэсь телестудизэс кылдытоно шуыса. Али, кылсярысь, Башкириысь телестудия анай кылын лэсьтэм сериалъёсыныз паймытъя, — азинтэ В. Ушаков.

Татарстанын но сериалъёсты, киноосты дублировать карон студия ужа ни 1998-тӥ арысен. Кызьы вера «Дубль видео» студилэн кивалтӥсез А. Яраш, бигер кылын мынӥсь дуннелы тодмо сериалъёсты телевизор пыр адӟыса, тросэз адямиос бигер кылэз дышетыны кутско, калык культура борды кыстӥсько.

Дублировать карем киноос сяна, шаерамы сериалъёс но, чеберлыко киноос но уно лэсьтылэмын вал. 1990-тӥ аръёсы, «Удмуртия» ГТРК кылдэм бере, телевизор пыр возьматъяны кутскизы телеспектакльёс, писательёслэн юбилейзылы быдэ кылдылӥзы документальной киноос, удмурт произведениосъя художественной киноос. Озьыен, «Соперницы» (1929-тӥ ар), «Тень Алангасара» (1995-тӥ ар) но «Инвис» кинопоттоннилэн туала киноосыз («Узы-боры» но «Пузкар») сяна, вал на «Италмас», «Сюреслэн пумыз ӧвӧл», «Дышетӥсь», «Гын сапегъёс», «Сэрег» но мукет киноос. Жаляса верано, соосты али калыке поттыны уг луы, «Удмуртия» ГТРК-лэн архивез коньдонтэк, пе, уг усьтӥськы.

Туала вакытэ удмурт кылэ дублировать карон бордын ужа Удмурт кун университетысь студентъёслэн «Берыктон луд» студизы — берло 10 ар ӵоже удмурт учкись доры вуизы швед, фин, эстон, немец киноос. Туэ вакчи кино, крезьгуро видеосуредъёс сниматьтон бордын ужазы «Шунды» огазеяськонысь егитъёс, «Инвис» кинопоттонниысь егитъёс ветлӥзы Эстониысь Циистре гуртын радъяськем лагере — отын вакчи кино лэсьтӥзы. Кызьы вераз егит сценарист Дарали Лели, асьмелэн ӧвӧл сценаристъёсмы, операторъёсмы, режиссёръёсмы, куараен ужасьёсмы, нош специалистъёсты палэнысь кутӥськод ке, соослэн уксётэк ужамзы уг поты.