Кез ёросын «Pest-Fest» фестиваль ортчиз

    Ужрадъясьёслэн верамзыя, «Pest-Fest»фестиваль Пельняньлы сӥзем фестивалез азинтэ. Угось Кез ёросын пешниклэсь тужгес но ческыт пельнянь пӧрало. Та будос вазь тулыс лымы шунам бере ик потэ, уйпал удмуртъёс сое мешокъёсын бичало. Туж данъяло та пешникез, малы ке шуоно солэсь уно сиён пораны луэ, пӧртэм витамениъёсын но узыр со.

    Фестивале люкаськем калык уйпал удмуртъёслэн аспӧртэмлыко сиёнъёсынызы но юонъёсынызы, удмурт калыклэн тулыс ортчытоно сям-йылолъёсыныз тодматскизы Кузёос ӟеч мылкыд кузьман сяна, пешниклэсь перепеч, пельнянь пӧраны дышетӥзы.

    Люкаськем калыкез шулдыртӥзы Дэбес ёросысь «Шудбур» но «Льӧмпу сяськаос», Ижкарысь «Зарни крезь» коллективъёс.

    Ужрадъясьёс — Удмурт Элькунысь йӧскалык политикая министерство, «Кез ёрос» муниципал кылдытэт, Калыкеъёслэн Эшъяськон юртсы – фестивальлэн азинтӥськемезлы оскемзэс верало. Таӵе аспӧртэмлыко тулыс фестиваль Удмуртиын улӥсьёслы гинэ ӧвӧл, туристъёслы но туж яралоз, дыр. Туэ, ужрадэ огъя 2000 ятыр адями пыриськиз. Вуоно аре куноос трослы уно луозы шуыса оскиськомы.