Казаньын — арня ӵукна

    Казаньын — арня ӵукна 1

    Та вакытэ отын радъямын 18 кылъёслы дышетон. Пусйымон: арнялы быдэ ортчыло удмурт кылъя урокъёс но. Азьвыл соосты нуылӥз удмурт кырӟанъёсты быдэстӥсь Павел Александров. Но Казаньысь со мукет интые улыны выжиз, соин ик урокъёсты нуыны оскизы вал Татарстанысь удмуртъёслэн огазеяськонзылэн кивалтӥсезлэн юрттӥсезлы Марина Ивановалы.

    — Выль дышетскон ар кутскиз, ми но усьтӥмы удмурт кылъя занятиосмес: радъясько соос Эшъяськонъя юртамы, — шуэ М. Иванова. — Зэмзэ вераса, та воскресной школаямы удмурт кылъя урокъёс радъясько ни кӧня ке ар ӵоже. Отчы мыло-кыдо ветло удмуртлыкен тунсыкъяськись адямиос. Та нуналъёсы ортчиз туэ дышетскон ар понна нырысетӥез урокмы. Пыриськыны мылкыд каризы 4 нылпиос. Соос Казаньын улӥсь — Тукаевъёслэн но Спиридоновъёслэн семьяысьтызы. Таос туж синмаськымонэсь: семьяосазы удмуртлыкез юн возё, пиналъёссэс удмурт кыллы дышето, сям-йылолъёсын тодмато. Азьланяз, малпасько, удмурт кылъя урокъёсамы пыриськыны мылкыд карисьёс ватсаськозы на, — пусйиз со.

    М. Иванова ивортэмъя, урокъёс лабыртыса-шудыса ортчо. Кыллэсь грамматиказэ дышетыса, учебникъёс сьӧрын пукыса ум улӥське, пе. Валтӥсь ужпум — адямилэсь удмурт сямен вераськыны быгатонлыксэ волятон, нош со мукет выжыысь ке — удмурт калыкен, кылэн тодматон.

    — Нырысетӥ урокмы туж тунсыко ортчиз, — веранзэ азьланьтэ М. Иванова. — Та 4 пиналъёслы сокем кельшем удмурт кылын вераськыны но шудыны, анай-атайёссэс ёрто ни, пе: ку табере ортчоз вуоноез урок? Удмурт шаерлэсь палэнын улӥськомы ке но, Татарстанын удмуртлыкез утьыны тыршиськом. Утем гинэ ӧвӧл, азинтӥськом но: вылысьтыз вылаз удмурт ужрадъёс ортчытъяськом.

    https://udmdunne.ru/