Калыкъёслэн Эшъяськон юртсылы талисман бырйизы

Калыкъёслэн эшъяськон юртсылы талисман бырйизы 1 Иворъёс

Удмурт Элькунысь Калыкъёслэн Эшъяськон юртсылэн талисманэз Италмас нимо кролик луиз.

Вожвылъяськон ортчиз «ВКонтакте» мерлыко вотэс пыр. Отчы 18 аресозь котькуд мылкыд карись пинал пыриськыны быгатӥз. Ужъёсты пӧртэм суредан амалъёсты кутыса быдэстыны луиз. Вормисез шара юалляськон пыр учкисьёс бырйизы.

Тужгес трос куара люказ но вормисе потӥз Кузебай Герд нимо гимназиын дышетскись Эрик Михайлов. Солэн верамезъя, суредам кроликез солэн италмас сяська кадь ик ӵуж, со туж яратэ эшъяськыны но пӧртэм калыкъёсын тодматскыны.

Кыкетӥ инты басьтӥз Татьяна Богатыревалэн ужез, куинетӥ интыез люкизы Анастасия Богатырева но Анна Барышникова.

Вожвылъяськонэ пыриськисьёс понна 1-тӥ инвожое — Нылпиослэн калыккуспо нуналазы — праздник радъялозы. Отын ик вормисьёсты данъялозы.

Нош учкисьёсын быръем талисманэз — Италмас нимо кроликез — Калыкъёслэн Эшъяськон юртэнызы нылпиослы радъям пӧртэм ужрадъёсысьтыз адӟыны луоз. Суред афишаосты, Таукаронъёсты но мукет арбериосты чебертоз.

Поделитесь с друзьями:
Дом Дружбы народов
Добавить комментарий