Калыкъёслэн Эшъяськон юртазы «Пурим» еврей праздник ортчиз

Туэ празднике лыктэмъёс понна выль мастер-класс дасямын вал – матрёшкаосты еврей костюмен буязы. Со сяна ужрадын еврей темая чеберлыко литератураен адӟытон дасямын вал. Озьы ик покчи куноос ӵашетӥсь крезьгур шудон – трещотка – лэсьтӥзы, аквагримлы дышетскизы.

Праздниклы концерт программа арня нуналэ ужась школае ветлӥсь покчиос дышетӥсьёсынызы, анай-атайёсынызы ӵош дасязы – пиналъёс еврей кырӟанъёсты, эктонъёсты быдэстӥзы, “Пуримшпиль” театр возьматонъёссэс  пуктӥзы. Ӝыт  сиён-юонэн тырмем ӝӧк сьӧрын йылпумяськиз. Валтӥсь сиён — “гоменташи” (мак пушкесэн куинь сэрго коньыт пыжиськем).

«Пурим» праздникез пусйизы Сарапулын но. «Электрон» культурая юртын 2 номеро школаын дышетскисьёс шулдыръяськизы.

Сарапулысь еврей огазеяськонлэн ёзчиосыз «Пуримлэн» кылдэмез сярысь веразы. Пиналъёс тодӥзы, праздникын валтӥсь инты карнаваллы висъяське шуыса. Сям-йылолъя  адямиос  маскарад костюмъёс дӥсяло.

Пумиськонын пиналъёс маскаос лэсьтыны дышетскизы. Нош йылпумъяса «Оменташен» ческыт сиён веръязы.

Ватсан: «Пурим» – тулыс праздник. Со асьме эралэсь 5-тӥ даурын кылдэмын.