Калыкъёслэн Эшъяськон юртазы Мерлыко палаталэн кенешонэз ортчиз

    Калыкъёслэн эшъяськон юртазы мерлыко палаталэн кенешонэз ортчиз 1

    Элькунысь Мерлыко палаталэн кивалтӥсез луиз Рашид Хуснутдинов —  «Ассоциация юристов России» мерлыко огазеяськонлэн улос ёзэтэзлэн быдэсъясь комитетэныз кивалтӥсь. Солэн воштӥсьёсыз: Михаил Зайцев — Союз «Удмуртская торгово-промышленная палата» огазеяськонлэн кивалтӥсез.но Александра Семёнова — «Объединение детей-инвалидов, инвалидов с детства, их родителей и опекунов г.Ижевска» огазеяськонлэн кивалтӥсез.

    Кенешонэ пыриськиз элькун кивалтӥсь но. Александр Бречалов мерлыко огазеяськонъёслэсь пайдалыксэс но кулэлыксэс пусйиз. Туэ улонэ пыӵаны кутско 12 йӧскалык проектъёс. Нош со 69 федерал программаос. Соос пӧлысь 50-аз пыриськоз Удмуртия но. Соин но мерлыко палатаысь езчиос азьын бадӟым ужпум пуктэмын — проектъёслэсь быдэсъяськемзэс чаклан.

    «Йӧскалык проектъёсты шаерамы улонэ пыӵатонын тӥляд валтӥсь ужпумды, — вазиськиз элькун торо. – Но тӥ валаны кулэ, асьмеос ваньмы одӥг пыжын уяськом. Оскисько, ваньмы ӵош тыршиськом Удмуртиысь калыклэсь  улонзэ умой пала воштон понна».