Калык эктонъёсын тодматозы Ижкарын
Та бадӟым ужрад эктонлэсь ваньзэ сямен ӧръёссэ, пӧртэм школаоссэ огазеялоз. Фестивалез радъясьёслэн верамъя, туэ ужрадэ Россилэн пӧртэм сэрегъёсысьтыз 3000-лэсь трос артистъёс пыриськозы. Ижкалэн площадкаосаз возьматозы соос быгатонлыкъёссэс: Удмурт Элькунысь операя но балетъя кун театрын, «Олимпиец» йӧ дворецын, Ижкарысь эктон школаосын. Нош фестивальлэн нырысетӥ нуанлъёсаз вожвылъяськон радъяськоз — артистъёс Удмурт Элькун Тӧролэн Кубокез понна нюръяськозы. Фестивальлэн нимысьтыз куноосыз Break-dance ӧръя 2014-тӥ арлэн дунне Чемпионъёсыз — "PREDATORZ CREW" команда но "Танцы на ТНТ" проектлэн финалистъёсыз.
7-тӥ куартолэзе фестиваль улсын Россиысь калыкъёслэн эктонъёссылы сӥзем нунал ортчоз. Татчы пыриськозы улосысьтымы ваньмыз сямен йӧскалык лулчеберетъя мерлыко огазеяськонъёс. Котькуд коллектив аслэз калыкезлэсь сяна мукет калыкъёслэсь но эктонзэс возьматоз. Кылсярысь, Промышленностья но экономикая Ижкар колледжын дышетскисьёслэн «Уральские Зори» коллективзы ӟуч, удмурт, бигер, казак эктонъёсын тодматоз. Нош 280-тӥ номеро садысь пиналъёс 8 калыклэсь эктонзэ дасяло.