Йылпумъяське «Шундыкар» лагере куиськонъёсты кутон

31-тӥ пӧсьтолэзе йылпумъяське «Шундыкар» лагере куиськонъёсты кутон.  Йылпумъянъёс элькун газетъёсын 1-тӥ гудырикошкон бере печатламын, «Шунды» огазеяськонлэн сайтаз http://udmshundy.ru поттэмын луозы.

Нош мар тодмо ини  – со ӧнерчиослэн нимтулъёссы:

“Эстрада” отрядлэн ӧнерчиез – Марина Галичанина – крезьгурчи, кырӟась, искусствоосъя школаын кырӟанъя дышетӥсь, “Центральный” культурной комплекслэн художественной руководителез, пӧртэм калыккуспо вожвылъяськонъёслэн лауреатэз. Трос пол “Шундыкарысь” но “Усточикарысь” “Эстрада” отрядысь нылпиосты визьнодаз.

«Крезьгурчиос» отрядлэн ӧнерчиез Владимир Жуйков луоз. Со Silent Woo Goore, bobolenin группаосын гитараен шудэ. Озьы ик «Шундыкарын» 2015-тӥ арын ӧнерчиосын кылдытэм «Малы ми» граппаязы пыриськиз. Ачиз крезьгур гожъя.  2015-тӥ арысен ик Владимир «Шундыкар» крезьгурчиосты визьнода. Пӧртэм крезьгуро инструментъёсын шудӥсь пиналъёсты огазеяса, аспӧртэм группа кылдытэ.

«Кибашлыос» отрядлэн ӧнерчиез – Василий Широбоков – пулэсь пӧртэм арбериос пӧрмытъя, удмурт крезьгуро инструментъёсты – крезез, кубызэз, – быдэстэ. «Азбар» мастерскоез вань, тӥледлы пулэсь арбериос кулэ ке, ӵапак отчы вазиськоно.

«Дӥськут дизайн» отрядысь нылпиосты туэ Надежда Касаткина визьнодалоз. Вордӥськиз Казахстанын, будӥз Эграын, дышетскиз Ижкарын. Собере Эграе ик берытскиз. Эшъяськон юртын ужа, этнической костюмъя художник-модельер луэ. Вурем дӥськут коллекциосыныз пӧртэм вожвылъяськонъёсын адӟем карымон луылӥз. Калыккуспо «Этно-Модно Псков» фестиваль-конкурслэсь гран-призэ вормиз, Евроазийской «Этно-Эрато» фестиавль-конкурслэн 2-тӥ степенё лауреатэз луиз, Калык сям-йылолъёсты утемез понна «Туристический сувенир» ӵошатсконын нимысьтыз дипломен пусъемын.

“Туспуктон” отрядлэн ӧнерчиез – Максим Егоров – туспуктӥсь, “Удмурт дунне” газетлы чебер фотоос лэсьтэ, со сяна пӧртэм пумо фотосессиос ортчытъя. Туспуктӥсьёс пӧлын радъяськем “Моя Удмуртия” вожвылъяськонын “Удмурт улон” номинациын вормисьёс пӧлы шедиз. Элькунысь киужъёсъя центрын аслэсьтыз адӟытонзэ радъялляз.

«Литература» отрядлэн ӧнерчиез – Анастасия Шумилова. Анастасиялэн кык кылбур бичетэз вань: «Дыр-эктон» (2015) но «Ку» (2018). Анастасия Россиысь но СНГ-ысь егит писательёслэн калыккуспо форумазы кӧня ке пол пыриськиз, кылысь кылэ берыктӥсьёслэн семинаразы вуылӥз. Туэ со Туала драматургияя но режиссурая центрен (ЦСДР) радъям ШУД-э (Удмурт драматургияя школае) ветлӥз, пьесаос гожъясьёс пӧлын «Шудом» вожвылъяськонэ пыриськиз. Отын Анастасиялэн эшеныз ӵош гожтэм «Год театра» пьесаез вормисе потӥз. Али Анастасия «Удмурт дунне» газетын ужа.

«Шундыкар» лагерь понна копак выль ӧр – Программирование. Та удысын дышетоз Григорий Григорьев. Григорий телефонъёслы удмурт кылын пӧртэм пумо ватсэстъёс лэсьтылэ. Удмурт клавиатура, удмурт-ӟуч кыллюкам, фин-угор разговорник, «Ӟенелик» шудон, удмурт кылэз дышетонъя «Кылдысин» ватсэт, нылпиослы «Чибори» раскраска, «Шунды» огазеяськонэн ӵош дасям «Удмурт алфавит» проект, дырпус виӝет, фин-угор радиостанциослы ватсэт, «Dart» гаезтлы ватсам дуннен ватсэт – ваньмыз солэн тыршеменыз кылдӥз.  Али Григорий бадӟым IT-компаниын программист луыса ужа.

“Фольклор” отрядлэн ӧнерчиез – Валерия Фёдорова. Валерия пичи дырысеныз ик кырӟась луыны малпа вал. Улон сюрессэ калык кырӟанъёсын но крезьгурен герӟаны луонлык школаын сюриз. Отын крезен но тодматскиз. Соин ик Валерия тужгес но тодмо крезчи луыса. Али тодосчи ӧръя мынэ но ӵем кунгож сьӧрын удмурт кырӟанъёсты быдэстэ. “Шундыкаре” нылпи сямен кӧня ке пол “Фольклор” отрядэ сюрылэмын. Табере ачиз но нылпиосты дышетыны дась.

Туэ “Суредаськон” отрядлэн выль ӧнерчиез –  Марина Степанова. Марина Элькунысь искусствоосъя школаез йылпумъямез бере, Удмурт кун университетын «Дизайн среды» ёзэтын дышетскиз. Али дышетон удысын тодон-валанзэ будэтэ. Берло дыре планшетэн суредаськыны яратэ. Удмурт кылын ӝӧк выл шудонъёсты поттӥсь Chukinder огинлы бадӟым юрттэт сётэ, «Ӟеч Перепеч» шудонэз ӵапак Марина быдэстӥз. Озьы ик кусыпъёссэ егитъёслэн DARTгазетэнызы возе.

«Журналистика» отрядлэн ӧнерчиез Вероника Ваулина – «Мынам Удмуртие» телерадиокомпаниысь журналист. Сое «Мон егит», «Огыр-бугыр» телепередачаосъя но «Эктоника», «ВАУшоу» радиоверанъёсъя быдэс Элькунмы тодэ. Со сяна таяз аре со «Вуоно журналист» курсъёсты нуиз, солэн бурд улысьтыз 4 выпуск потӥз ини. Вероника «Шундыкаре» пинал дыръяз но ветлӥз, собере вожатой сямен лагере берытскиз. Нош туэ 4-тӥзэ егит журналистъёсты визьнодалоз ни.

«Шундыкар» лагерьлэн кивалтӥсез – Алина Чернова. Солы ас вакытаз «Шундыкаре» нылпи, вожатой сямен вуылыны удалтылӥз. Туэ 3-тӥ арзэ ини сменаеэн кивалтэ. 2016-тӥ арысен «Шундыкарез» радъясь егитъёслэн «Шунды» огазеяськонзылэн тӧроез луэ. Пӧртэм ӵектосъёсты улонэ пыӵатэ. Ижкарысь калыкъёслэн эшъяськон юртазы ужа.

Контентмейкер, мемолог и журналист

Дом Дружбы народов
Добавить комментарий