Ӝуатскы, кизили!
«Пичи шоу — ёрос кизили» конкурс ялэмын вал кылем арын. Отчы пыриськыны мылкыд каризы элькунысьтымы пӧртэм ёросъёсысь 3 аресысен 12 аресозь удмурт нылпиос — усто кырӟаны-вераны, эктыны быгатӥсьёс. Озьы «Мынам Удмуртие» телекомпаниысь журналист, та конкурс понна кыл кутӥсь Ольга Ардашева туэ ӝыны ар куспын ортчиз вань ёросъёстӥ: котькудаз пумиськылӥз усточи нылпиосын. «Мынам Удмуртие» телеканал соосты быдэс шаермы тыр возьматъяз. Озьы пӧрмиз зэмос удмурт телешоу!
— Та проектмылэн кылем сезоназ пӧртэм ёросъёсысь 26 кизилиез ӝуатӥмы. Быгатонлыкъёссылы паймод: удмурт кылын кырӟало-верало, пӧртэм крезьгуро арбериосын шудыны быгато, йыр вылазы но эктыны пӧрмыто, ява! Куд-ог пиналъёс асьсэ понна пыриськизы, уноез — нылпи садысьтызы, школаысьтызы быдэс группаенызы. Йылпумъянъёс лэсьтӥмы Нылпиосты утён нуналэ, 1-тӥ июне: Ижысь Киров паркын ортчытӥм «Пичи шоу — бадӟым кизили» гала-концертмес, — шуэ Ольга Ардашева.
Но кин ӧз вутты пыриськыны та телешоулэн нырысетӥ сезоназ — эн ӝожоме! Усьтэмын «Пичи шоу — ёрос кизили» проектлэн выль сезонэз. Таяз радэ но отчы пыриськыны быгатозы пӧртэм ёросъёсысь, гуртъёсысь удмурт кылын пичи ке но вераськыны быгатӥсь 3 аресысен 12 аресозь пиналъёс. Соослэсь быгатонлыкъёссэс дунъялозы 4 номинациосъя: тужгес устоез кырӟась, кылбурась, эктӥсь но крезьгуро арбериен тужгес устоез шудӥсь.
Пусйыны кулэ: вожвылъяськонэ нылпиос асьсэ понназы гинэ но пыриськыны быгатозы, нылпи садысьтызы, школаысьтызы, нылпи творчествоя школаысьтызы коллективъёсынызы но. Куриськонъёсты кутозы 31-тӥ сентябрёзь pichioli@yandex.ru электрон адресъя.
Конкурс сярысь тодыны быгатоды myudm.ru/tv адресъя (зӥбоно «Ёрос кизили» пус вылэ). Юанъёсты кылдӥзы ке, вазиське 8-982-121-48-51, 8-950-154-18-90 телефонъёсъя.
Телешоулэн выль сезонэз кыстӥськоз вуоно арын май пумозь. Сое учкыны быгатоды «Мынам Удмуртие» каналысь. Лыдэ басьтэ: кабель но цифровой сигналэн сяна, та каналэз учкыны луэ Интернет, озьы ик спутник антенна пыр («Телекарта» но «Триколор» тэркы возисьёс).
Туспуктэм: «Шудон корка» огинлэн «ВКонтакте» бамысьтыз.