Ижысь 17 номеро школаын «Этнографическая карусель» фестиваль ортчиз
«Куинетӥ арзэ ини 5-тӥ-7-тӥ классысь нылпиосты анай кыллэн калыккуспо нуналыз азьын та фестивале люкаськомы, — вера Ижысь удмурт кылъя но литературая дышетӥсьёслэн огазеяськонэнызы кивалтӥсь Елена Ямщикова. — Бадӟым нылпиос анай кылзэс тодон-валанзэс «Тол шудонъёсын» возьмато ке, покчигес нылпиос палэнэ кылё кадь потӥз. Соин та фестивалез радъяно кариським».
Озьы нылпиос асьсэ командаенызы тодматӥзы. Кылсярысь, 60 номеро школаысь «Эмезьёс» табань «пыжизы», удмурт кырӟан быдэстӥзы, куно пумитазы. 56 номеро гимназиысь нылпиос «Ӟазег уя, ӵӧж уя» шудӥзы. Визь сынан люкетэз дыръя пиналъёс удмурт шаерзэс тодэмзэс возьматӥзы — синпелетъёсты тодмазы, юанъёслы валэктон утчазы. Пусйыны кулэ, котькуд командалэн ужаз пыриськыны кулэ вал одӥгез нылпилэн анай-атайез.
Анай-атайёс понна нимысьтыз вожвылъяськон но дасямын вал. Соос пӧртэм выжы калыкъёслэсь сиёнзэс тодманы, малэсь со пӧрамын вераны но учкисьёслы сое сиемзы потымон кадь вераны кулэ вал.
Конкурсын вормиз 56 номеро гимназиысь «Дэмдорчиос» команда, 2-тӥ интые потӥзы 74-тӥ школа, 56 гимназиысь «покчиос-дэмдорчиос» куинетӥ луизы.