Ижын ортчиз Захар Прилепин писателен пумиськон
![Ижын ортчиз захар прилепин писателен пумиськон 1](https://udmddn.ru/wp-content/uploads/2017/03/приле.jpg)
Вераськон мынӥз «юан-валэктон» амалэн. Пумиськонэ лыктэмъёс трос юалляськизы Захарлэн военной улонэз сярысь. Уго со ялан войнаен ваче вамышъяз. 90-тӥ аръёсы — Кавказ компания, али — Донбассын нюръяськон. Соин уно книгаосыз но сӥземын та темалы. Кылсярысь, «Взвод» роман. Татын со быгатыса герӟа войнаез но литератураез.
— Тросэз уг тодо, Александр Пушкинлэн гусар луэмез потэ вал шуыса. Но сое войнае ӧз кутэ. Соин сэрен но со пегӟыса сямен Кавказэ вуиз, — вера писатель.
Залын чузъяськиз «Обитель» роман пумысен но юан, татын писатель возьматэ 30-тӥ аръёсысь Соловки лагерьысь улонэз.
— Соловкиын быриз удмурт кылбурчи, югдытӥсь Кузебай Герд. Пуштросэзъя кӧняез книгаяды малпамын, кӧняез зэмос улонысь басьтэмын. Быгатӥды-а тӥ сюрыны архивъёсы? — юаз литературовед Александр Шкляев.
— «Обитель» романме гожтыны кутскон азьын 3 ар пуки архивъёсын. Материал люкаськиз тодосчилэн Д. Лихачевлэн справкаосысьтыз, священниклэн П. Флоренскийлэн гожтэтъёсысьтыз… Шуыны луоз, сюжетсэ малпаны мыным юрттӥзы Соловкиысь кышномуртъёс. Утчаськемея сюжет борды пӧлэсьтӥськизы адямиослэн улонъёссы. Сомында адямиос та лагерь пыр потэмын! Уйин соос мынам укноям йыгасько кадь вал но шуо: мон но отын вал, мукет главаяд мон сярысь но гожты.