Ижкарысь йӧскалык лыдӟиськонниын «Кубо» клуб ужзэ мытӥз

«Кубо» клублэн нырсетӥ ужрадаз пыриськиз элькунысь устолыкъя нылпи школаысь фольклоръя “Шудон” ансамбль. Нылъёс «Куно пумитан», «Урам эктон» гуръёсты быдэстӥзы. Ӝытын нылъёс азьын валтӥсь ужпум – лыктэмъёслы удмурт кылын вераськыны, ог-огенызы тодматскыны, возьдаськон сямез палэнтыны юрттоно.

«Татын кусыпъёс матынгес мед луозы адямиослэн, мед тодматскозы. Соин ик, тани милям нылпи коллектив ке, милям шудонъёс, кырӟанъёс, эктонъёс пыр ми мед матэгес кариськомы шуыса, ми мед тодматскозым, мед эктомы», – вера  “Шудон” ансамблен кивалтӥсь Юлия Павлова.

«Кубо» клубе вуыны быгато вань мылкыд карисьёс. Но радъясьёс тужгес но возьмало удмурт кылъя курсъёсы ветлэм адямиосты. Басьтэм тодон-валанъёссы медаз вунэ, удмурт кылэз улоназы тросгес кутыны мед быгатозы шуыса.

Анай кылын вераськон клублэн пуштросэз узыр луоз. Азьланяз малпамын выжыкылъёсын, мультфильмъёсын, фольклорен тодматсыкыны, пичияк сценкаос пуктыны.

«Мынам потэ вал элькунысьтымы тодмо адямиосты ӧтчаме та клубамы. Малы? Адями мед кылоз кызьы кылмы чебер чузъяськыны кулэ. Кырӟан ке, мед сое кырӟалоз быгатӥсь адями. Выжыкыл ке, мед сое артист лыдӟоз», – шуэ йӧскалык лыдӟиськонниысь ӧнерчи Елена Кутасова.

Матысь дыре удмурт кылын вераськонъя клуб Глазкарын но усьтӥськоз.

http://www.myudm.ru/

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий