Ижкарысь мер транспорт дугдылонниослэн нимъёссы ӟуч но удмурт кылъёсын гожтэмын луозы
20-лэсь трос нимъёсты Удмуртиысь йӧскалык политикая министерствоысь ӧнерчиос берыктӥзы.
«26 дугдылонни. Кылсярысь, «Улица Чайковского», «Школа номер 83» — «Чайковский урам», «83 номеро школа», «дугдылонни» кылъёсыз соослэн али отын ӧвӧл. Радиозаводэз мукет сямен нокызьы но уд шуы, Радиозавод ик шуом. Вань сыӵеосыз, тани «Лесхоз», «Радиозавод», «Станкострой», соосты нокызьы но уд берыкты, соос озьы ик кылё», — вераз иворъёсъя «Удмуртия» агентстволы элькунысь йӧскалык политикая министерствоысь валтӥсь ӧнерчи Елизавета Ложкина.
Дугдылонниослэн кык кылын нимъёсынызы пулъёсты таяз арняе ошылыны кутскозы. Гужем кутсконысен Ижкарын ньыль павильонъёс пуктэмын: Песочной урамын («Телецентр» дугдылонни), Дерябин проездын («Станкострой» дугдылонни), Киров урамын («Главпочтамт» дугдылонни) но Холмогоров урамын («83 номеро школа» дугдылонни).
2017-тӥ ар пумозь кар тӧрлыкъёс дугдылонниосын эшшо 31 липет пуктыны чаклало. Солы 9,9 миллион манет быдтозы. Одӥгезлэн дуныз — 170 сюрс манет.