Ижкарысь Калыкъёслэн Эшъяськон юртазы туннэ «Удмурт Кенеш» огазеяськонлэн Пичи кенешез ортчиз
Нимысьтыз доклад лыдӟиз дышетонъя но тодосъя министр Светлана Болотникова. Со ивортӥз кыӵе югдур туннэ анай кылэз дышетонъя шаерамы. Солэн верамезъя, туэ удмурт кылэз дышетӥсьёслэн лыдзы 963 муртлы кулэсмиз. Ӧжытгес лыдпус луэмын Шаркан, Пичи Пурга, Можга, Игра, Алнаш ёросъёсын но Глазкарын. Со вакытэ ик вань, кытын лыдпус будӥз — со Балезино, Якшур-Бӧдья, Кияса, Глаз но Юкаменск ёросъёс но Ижкар.
Нош йӧскалык ивор вӧлмытон ужпумъя доклад лыдӟиз «Удмуртия» телерадиокомпанилэн кивалтӥсез Марина Городилова.
Солэн верамезъя, улосвыл телеканалъёсты табере федерал каналын учкыны луоз. 29-тӥ шуркынмонысен котькуд ужан нуналэ ОТР каналын 7-сен 8 часозь но 18-сен 19-озь шаерамы улӥсьёс иворъёсын программаосты учкыны быгатозы. Нош шутэтскон нуналъёсы — передачаосты.
Али вераськон мынэ ӟуч кылын потӥсь программаос сярысь гинэ. Но улосвыл телеканалъёсын кивалтисьёс Росси кивалтэтэ вазиськизы анай кылъёсын программаосты но эфире поттан пумысен. «Кенешчиос» но огкылысь луизы кылдэм югдуръя вазиськыны ОТР-лэн кивалтисьёсызлы.
«Удмурт Кенешлэн» Пичи Кенешаз туннэ сӥлы каризы экономика наукаосъя докторез но профессорез Юрий Перевощикоез. Солы Трокай Борисов нимо йӧскалык преми сётэмын.
Озьы ик огазеяськонлэн Данъян книгаяз пыртэм муртъёсты данъязы.
Трос аръёс ӵоже удмуртлыкез калыке пыӵатэмзы, сям-йылолъёсты но лулчеберетэз утемзы понна «Удмурт Кенешлэн» исполкомез пуктэмъя Данъян книгае ньыль адями пыриз:
— Бородова Валентина Николаевна — Грак ёросысь нылпи садын ужась визьнодасез, Ёрос кенешлэн правлениезлэн ёзчиез;
— Полянкина Зинаида Николаевна — «Удмурт Кенеш» огазеяськемлэн Ува ёросысь ёзэзлэн азьвыл кивалтӥсез, Ёрос кенешлэн правлениезлэн ёзчиез;
— Коробов Пётр Вениаминович — «Удмурт Кенеш» огазеяськемлэн Селта ёросысь ёзэзлэн азьвыл кивалтӥсез, ёросысь Нылпи творчествоя юртысь ӧнерчи;
— Наумова Валентина Евгеньевна — Яр ёросысь «Ошмес син» лулчеберетъя центрлэн кивалтӥсез, Нылпи творчествоя юртысь тодон-валан сётӥсь дышетӥсь.