Ижкарын «Йолдызлар янгыры» фестиваль ортчиз

Фестиваль-конкурс 2010-тӥ арысен радъяське. Отчы пырисько нылпи но быдэ вуымтэослэн коллективъёссы, озьы ик 5-сен 17 аресозь нимаз кырӟасьёс.

Туэ сцена вылын быгатонлыкъёссэс возьматӥзы Удмуртиысь, Пермь улосысь, бигер шаерысь усточиос. Фестиваль 3 номинациосъя мынӥз: хореография, вокал, чеберлыко кыл.

Озьы ик фестиваль улсын таӵе вожвылъяськонъёс вал: «Туган телем — иркэ голем» («Анай кыл — лулпушелэн кылыз») но «Көмеш каләм» («Азвесь тылы»).  Кылбур лыдӟисьёслэн «Туган телем — иркэ голем» вожвылъяськонзы бигер кылбурчилэн Габдулла Тукайлэн вордӥськем нуналэзлы но солэн «Туган тел» кылбурезлы 110 ар тырмонлы сӥземын вал.

«Көмеш каләм» конкурсын бигер кыллы но литературалы сӥзем сочинениосты но эссеосты эскеризы. Егит гожъяськисьёс «Мин — татар баласы» («Мон ас калыелэн нылыз/пиез»), «Туган телем белән горурланам» («Мон данъяськисько ас кылыным»), «Габдулла Тукай дәресләре» («Габдулла Тукайлэн урокъёсыз») темаосты усьтӥзы. Вормисьёслэн ужъёссы «Янарыш» газетын печатласькозы.