Ижкарын выль емышъёслы сӥзем праздникез пусйизы

    Ижкарын выль емышъёслы сӥзем праздникез пусйизы 1

    Арысь аре, 2-тӥ гудырикошконэ, Ижкарысь Кызьпу арама удмурт калыкез «Выль» шулдыръяськонэ люка. Таяз радэ но куноос трос гинэ люкаськизы.

    Огинэ люкаськем калыкез праздникен ӟечкылазы Кун Думаысь депутат Олег Гарин, йӧскалык политикая министр Эдуард Петров, Индустри ёрослэн кивалтӥсез Любовь Зайцева, «Удмурт Кенеш» огазеяськонлэн Тӧроез Татьяна Ишматова но мукет бадӟым куноос.

    Татьяна Витальевна тау кариз вань люкаськемъёслы, ужрадэз радъясьёслы но вуэм фольклор коллективъёслы. Озьы ик со праздникен ӟечкылаз но шумпотонзэ вераз сям-йылолъёсмы туала арын но утисько шуыса. «Берло аръёсы элькунамы «Выль» праздник выль но выль кужым басьтыса калык пӧлы вӧлме. Со вера одӥгез сярысь: удмуртлыкмы азинске, асьмеос азьланьтӥськом удмурт лулчеберетмес. Со тӥляд тыршемдылы луыса! Азьпалан но ог-огмес валаса, тупаса улыны мед быгатомы. Праздникен эшъёс! «Выль» шулдыръяськонэн!» — шуиз со.

    Празднике люкаськем куноосты шулдыртӥзы но шумпоттӥзы элькунысьтымы дано артистъёс Геннадий Бекманов но Геннадий Кузнецов, ӝужась кизилиос Оля Ипатова, Ирина Полякова но Александр Ешкеев, озьы ик Ижкарысь но Дэри ёросысь фольклор коллективъёс: «Тюрагай», «Чильтэр», «Мечтатели», «Ӟардон», «Ягдор» но «Задор мылкыд».

    Пичиос но мӧзмыса ӧз улэ. Удмурт эпосысь геройёс – Батыр, Италмас но Лӧпшо Педунь – соосын ӵош йӧскалык шудонъёсын тодматскизы но шудӥзы.

    Нош мылкыд карисьёс ас бакчаязы будэтэм емышъёсынызы «Удмурт емыш мунё» конкурсэ пыриськизы но кузьымъёс утӥзы. 1-тӥ интыез «Пыре ни азбарамы» лэсьтэм композициеныз Валентина Ившина басьтӥз. 2-тӥ «Лӧпшо Педунь» композициеныз Людмила Исхакова луиз. 3-тӥ интые «Бакча натюрморт» композициеныз Галина Эскендерова тубиз. Вормисьёс но котькудӥз, кин пыриськиз конкурсэ, имысьтыз синпель кузьымен пусъемын вал.