Ижкарын удмурт кылэз дышетыны мылкыд карисьёс понна курсъёс ужало
Пумиськонъёсы пӧртэм удысын тыршись, пӧртэм арлыдъем но пӧртэм тунсыкъёсын адямиос люкасько.
«Кӧня адями, сомында ик муг. Тани туэ лыктэмъёслэн, кыкезлэн, вань выль мугзы, сыӵеез ӧй вал на. Соос лыктӥзы калыкен эшъяськыны, калыкысь шедьтыны асьсэлы клиентъёс. Одӥгез со сетевой маркетинг шуиське, мукетыз — страховой. Соос туж тыршыса ужало. Вань мӧйыос. Соос туж шумпото, татын ӟеч калык люкаськемын шуыса. Со калыкен соос татын ӵош ужало, адӟисько, мӧзмонлэсь пегӟо, мон шуысал», — вера Ангелина Решетникова.
Курсъёсы котькуд пыриськисьлы кушем ним сётэмын. Соос кинлэсь ке рользэ шудӥсьёс луо. Пӧлазы вань Парижысь туспуктӥсь Мишель, Венгриысь тодосчи Медико, Ижкарысь кылбурчи Айно, Женеваысь кырӟась Италмас, Эстониысь дышетскись Эло, Можгалась журналист Лиза, Сыктывкарысь журналист Никита но Ижкарысь кивалтӥсьсы Дыдык (Ангелина Решетникова).
«Дышетскон программамылэн сюжетэз вань. Ваньмыз рольёслы люкемын. Соос котырысь калыкысь басьтэмын. Отын вань Юрий Лобанов, Рает Рози, Эстониысь мынам эше, шуом, отын вань Анна Шкережи, Венгриысь тодосчи, но мукет 12 адями. Огшоры малпад ке улонысь, со уг ужа. Тодмо муртэз басьтыны кулэ. Со одӥгез дышетон методикамылэн куронэз. Тодмо муртэз басьтӥськод ке, тодӥськод солэсь выросъёссэ, солэсь ужан удыссэ. Адямилы валэктӥськод ке, тон егит журналист, тон блогер, тон вераськись интернетын, тон Комиысь лыктэмын, тонэ ваньмыз тодо шуыса, со соку ик шудыны кутске, «о, мон блогер, мон сыӵе шуыса», — валэктэ курсъёсын кивалтӥсь.
Дышетсконсконзы тодосчиен Бибинур Загуляеваен но Ангелина Решетниковаен кылдытэм «Дуно эше» книгая радъяське.
«Кылдытӥмы вал таӵе книга профессорлэн, дышетӥсьлэн Галина Китайгородскаялэн методикаезъя. Со ачиз милемлы та книгае лэзиз аслэсьтыз гожтэмзэ пыртыны. Со сяна вань дышетӥсьёслы ужаны юрттэт книга. Солы кылдытэмын программа. Та книгая ортчытэмын эксперимент. Со книгаын люкетъёсыз люкемын пӧртэм темаослы но огъя сюжетэз вань. Со сюжетъя ми быдэс фин-угор дуннеысь егитъёс люкаськемын Ижкаре но ваньмы вераськиськомы удмурт кылын», — вера Решетникова.
Огез дышетскисьсы — Вика (курсъёсын Мишельлэсь рользэ шудэ) — вуэмын Коми элькунысь. Курсъёсы кыкетӥзэ гинэ вуэм ай, но мар но со вераны быгатэ ини. Викалэн верамезъя, со дышетскемезъя филолог луэ. Коми но удмурт кылъёсты ӵошатыса но вуттэм ини.
«Удмурт но коми кылъёс туж ог-огзылы укшало. Кылсярысь, мае ке уг тодӥськы ке, мон коми кылысь корень борды удмурт кылпум ватсасько. Тупа кадь, — серекъяса вера со. — Али мон Ухта карын улӥсько. Анай кылэ коми луэ. Мынам ӵошатэме потӥз кылъёсты. Удмурт кылэз дышетэме. Эшшо ик мон али Ижкарын. Луонлыке вань. Эшшо ик дунтэк дышетыны эшшо одӥг кылэз. Малы ке дышетскыны луонлык вань ке, дышетсконо».
Ангелина Решетниковалэн верамезъя, туннэ нуналлы Ижкарын удмурт кылэз дышетонъя 7 группа ужа. Со сяна, арлы быдэ кыӵе ке ёросын курсъёс радъясько. Туэ сыӵеос кылдӥзы Эграын, Якшур-Бодьяын но Грак ёросын. Со сяна азьло сямен ик ужало Вавожын, Можгаын, Глазкарын, Воткакарын но Кезын. Отын радъясьёслы юрттэ «Удмурт Кенеш» огазеяськон. Нош вань та ужанрадлы коньдон висъя Удмуртиысь йӧскалык политикая министерство.