Ижкарын «Шудком» шудонлэн пумиськонэз ортчоз

    Ижкарын «шудком» шудонлэн пумиськонэз ортчоз 1

    Таиз ар понна нырысетӥ шудонэ 14 команда люкаськылӥз. Вормисе потӥз Удмурт кун университетысь Историяя факультетысь выпускникъёслэн но студентъёслэн «Виквак» командазы.

    Шудон ортче 3 раундэн, отын огъя 27 юанлы валэктон утчаны кулэ. Котькуд раунд вискын крезьгур чузъяське. Таяз пумиськонын Аня Камали кырӟалоз. Ӝытэз нуоз журналист Александр Бикузин.

    «Нырысетӥ шудонъёсын удмуртлыкен герӟаськем юанъёс ӧй вал, шуыны луоз, — вера Александр Бикузин. – Нош берло 5-6 шудонъёсын Элькунмы сярысь, соин герӟаськем юанъёс трос пыртылыны кутскизы. Шуом, Пётр Ёлкинлэн, Пётр Чайковскийлэн, Флор Васильевлэн творчествоенызы герӟасьемъёсыз вал. Собере пыртэмын удмурт пужыосъя, мадёсъёсъя юанъёс. Котькуд шудонын туж тунсыко юанъёс луо. Историез но мур тодытэк, юанэз сак кылзыса, шонер валэктон шедьтыны луэ. Со юанъёс малпаськыны быгатэмез – логикаез кулэ каро».