Ижкарын ортчиз удмурт анай-атайёслэн «Пельысь пеле, ымысь ыме» пумиськонзы

Анайёс нырысь ик кенешизы, кыӵе тусын-пуштросэн ортчыны кулэ таӵе пумиськонъёс. Луэ-а соослэсь семинар выллем дышетон люкетсэс огазеяны пиналъёсын дэмен шудонэн? Вань анайёслэн сюлмаськонзы огкадь: Ижын удмурт кылын вераськыны нокытын, мукет сямен вераса, уг тырмо удмурт интыос, удмурт омыр.
 
«Малпасько, таӵе пумиськонъёслэн одно ик луыны кулэ дышетон-визьнодан люкетэз но, шудон люкетэз но, — вера «Билингва» проектлэн кивалтӥсез Татьяна Волкова. — Соосты нимаз висъяны быгатоно. Лекция практикаен мед герӟаськоз».
 
Пичи пумиськонэ кызь адями пала люкаськиз бере, озьыен, та ужпум котыраз кужым люка. Карын улӥсь семьяос но ёросъёсысь ӟучомыны шӧтасьёс анай клублэсь ужзэ «Билингва» вотэсбам пыр чакланы быгато. Та проектлэн кивалтӥсез, дышетӥсь Татьяна Волкова оскытӥз: сайтэ люканы тыршозы анайёслы кулэ луись шыкыс — шудонъёсты, лыдъяськонъёсты…
 
«Городын но удмурт пиналъёслы одно ик инты но, вакыт но сюроз, — шуэ Оксана Крылова. — Таяз гужем, кылсярысь, ӧсъёссэ выльысь усьтоз «Яратоно удмурт кыл» лагерь. Анайёс, атайёс но пичи пиналъёссы быгатозы быдэс арнялы удмурт кылэ зымыны, огазьын шудыны, тунсыко удмурт азьветлӥсьёсын тодматскыны. Смена ортчоз 26-тӥ инвожоысен «Мумыдор» азбарын. Шутэтскон вакыттэс кызьы радъялоды, али ик малпаськыны муг вань ини: мед со пайдаен, удмурт кылэн артэ ортчоз».