Ижкарын нош татальной диктант гожтозы

Ӟуч кылын шонер гожъяськыны быгатэмзэс эскерыны мылкыд карисьёслэн лыдзы арысь аре йылэ. Кылем арын акцие пыриськиз 76 кунысь 22 сюрслэсь ятыр адями. Диктантэз гожто акцилэн вотэс бамаз но — со понна totaldict.ru сайтын регистрация ортчоно.

Туэ диктантлэсь текстсэ гожтиз писатель, литературовед, сценарист но критикн Павел Басинский. Диктант 4 люкетлэсь пӧрмытэмын. П. Басинскийлэн гожтэмезлы инъет луизы ӟуч классикъёслэн произведениоссы: А. Пушкинлэн «Моцарт и Сальери» пьесаез, Н. Гогольлэн «Мёртвые души» поэмаез, М. Горькийлэн «На дне» пьесаез. П. Басинский ӧз вунэты яратоно авторезлэсь — Л. Толстойлэсь — произведениоссэ но.

Диктантлэсь кыӵе люкетсэ гожтозы Удмуртиын, тодмо луоз 13-тӥ оштолэзе гинэ.

Ижкарын бадӟым площадкаос ужалозы вылӥ дышетсконниосын, школаосын но лыдӟиськонниосын. Радъясьёс диктантэз аспӧртэмлыко но шулдыр орчытыны малпало. Кылсярысь, одӥгаз площадкае тӧдьы йырсиё нылъёсты гинэ пырыны лэзёзы, мукетаз — кроссовкиосын. Озьы ик акци мыноз аэропортын, трамвайын, пельнянь сиён кафеын. Нош одӥг интыын тесктэз лыдӟоз Бэтмен. ИжГТУ-ын юри площадка усьтозы кунгожсьӧрысь вуэмъёслы.

Кылем арын ӟуч кылъя тодон-валанъёссэс 2000 пала Ижкарын улӥсьёс эскеризы. Чакламъёсъя, туэ но солэсь ӧжыт уз луы.