Ижкарын «Миру — мир» акци ортчоз

Калыкъёслэн Эшъяськон юртсы азьын «Миру — мир!» калыккуспо концерт-акция радъямын луоз. Отчы пыриськозы нылпи коллективъёс, элькунысь йӧскалык огазеяськонъёслэн азьветлисьёссы.

3-тӥ куарусён – террористъёслэн ки улазы шедьыса, соослэн «сьӧд» ужъёссы сэрен быремъёсты, озьы ик ужазэс быдэстыку бырем эрикрадэз утисьёсты буре ваён нунал.

Кызьы иворто акциез ортчытӥсьёс, концерт сяна, асфальт вылын суредаськонъя конкурс луоз. Озьы ик Абхазиысь диаспоралэн ёзчиосыз асьме улосчимылэн Надежда Курченколэн подвигез сярысь мадёзы. Кызьы 19 аресъем стюардесса аслэсьтыз улонзэ жалятэк, самолётын кузёяськись террористъёслы пумитъяськиз. Абхазия но Краснодар улосъёс вискын Надежда Курченколы обелиск сылэ.

Быремъёсты буре вайыса, ужрадэ пыриськисьёс  минут ӵоже чус улозы но инбаме тӧдьы шаръёсты лэзёзы.

«Асьмеос ваньмы терроризмлы пумит султыны кулэ, та дуннеысь быдтоно со «сьӧд» кужымез, — шуо акциез радъясьёс.

Ватсан: Террористъёслы пумит нюръяськон нунал 2005-тӥ арын Уйпал Осетиысь Беслан карын луэм учыр бере юнматэмын. Отын 2004-тӥ арын выль дышетскон ар кутскыку, террористъёс 1 номеро школае пыризы но 300-лэсь трос адямиез быдтӥзы, соос пӧлысь 150-эз нылпиос.