Ижкарын Максим Агафоновлэн адӟытонэз усьтӥськиз
17-тӥ южтолэзе Ижкарысь Арт-резиденциын суредасьлэн, туспуктӥсьлэн, дизайнерлэн Максим Агафоновлэн «Оломарно» адӟытонэз усьтӥськиз.
Ужъёсаз Максим кутэ удмурт мифологиысь пусъёсты, арбериосты. Ӵемысь суредъёсысьтыз адӟыны луэ бадӟым сьӧд буёл вылысь туж пичи гинэ удмурт нылкышноосты. Кыдёкысен уд но вала, мар вань суред вылын, матэгес кариськыса гинэ, ваньзэ рос-прос адӟыны луэ.
— Мон Эгра ёросын Квардавозь удмурт гуртын ворд-ски ке но, пичи дыръям ӧй вал удмурт эктонъёс, тыпыртонъёс, ӧй вал удмурт дӥсь, ӧй вал удмурт сям-йылолъёс, — вера Максим. — Соин ик адӟытонэ пыртэм суредъёсам мон возьматӥсько удмуртлыклэсь сыӵе палзэ, кудзэ мон ӧй адӟы пичи дыръям, пумиськи соин быдэ вуэме бере гинэ.
Адӟытон ужалоз 27-тӥ южтолэзёзь.