Ижкарын лулчеберет удысын ужасьёсты сӥлы каризы

Тужгес устооссэ Росси но Элькун данъетъёсын пусйизы, Элькунысь культура удысысь дано ужась ним сётӥзы.

Пусъемъёс пӧлын Пичи Пурга ёросысь Уча лыдӟиськоннилэн кивалтӥсез Елена Окунева. Солы Культура удысысь дано ужась ним сётэмын. Елена Михайловна кивалтэм улсын ужъюрт 2012-тӥ арын Элькунысь тужгес усто лыдӟиськонни ним утӥз. Проектсы 200 сюрс манет тыр грант басьтыны быгатӥз. Ваньмыз со — будӥсь нылпиосты лыдӟиськоннилэн ужез пыр тодон-валан борды кыстӥськыны юрттон вылысь.

«Пиналъёслы ялан мар ке но выльзэ, тунсыкозэ малпаны кулэ, — шуэ Елена Окунева. – Мылкыдзэс ӝутон понна конкурсъёс малпаськом яке лыдӟиськонни пушкамы марзэ ке воштӥськом. Ӵемысь шудонъёс ортчытъяськом».

«Элькунысь лулчеберет удыс ӧнер нуналзэ чебер ужрадэн но чебересь лыдпусъёсын пумита, — шуиз Элькун министр Владимир Соловьёв. — Миым понна гинэ шаерысьтымы лулчеберетъя но туризмъя ведомство сюлмаськемен, 32 семьялы улон инты басьтыны юрттэт сётэмын, 7 семьялы мерлыко улонни виъямын, 11 егит ӧнерчиослы Ижкарын висъет сётэмын. Гуртъёсысь культурая юртъёслы 16 автобус басьтэмын».

www.myudm.ru/