Ижкарын губиен но кушманэн пельнянь кутӥзы

Кафелэн кузёез Ольга Кононовалэн верамезъя, губилэсь но кушманлэсь пельнянь — сяме пырем удмурт пӧрамъёс луо. Но кушманлэсь пельнянь шергес пумиське, малы ке шуоно 10 килограмм бакча сиёнлэсь 3 килограмм гинэ пушкеслы мынӥсь макеез потэ. Со кӧс луыны кулэ ӧвӧл, соин ик удмуртъёс отчы курегпуз пилё. Ӝӧк вылэ пуктон азязы отчы нӧкы вӧй ватсало, нош веттало, дышемъя ини, йӧлвылэ.
 
Мастер-классэ куинь адямиен ньыль командаос пыриськыны мылкыд каризы. Соос губиен пельнянь кутонын ӝоглыкъя но ӟечлыкъя ӵошатскизы — пушкесэз сьӧд ке но, колоез чылкыт кыльыны кулэ вал.
 
Конкурсын огдыре куинь команда вормиз. Соос быдэн 75 пельнянь кутӥзы. Ужрадэз радъясьёс соос пӧлысь бырйизы адямиосты, кин 11-тӥ тулыспалэ Шор площадьын та выллем ик ӵошатсконэ пыриськоз.
 
«Пельняньлэн дунневыл нуналэз» улсын мастер-классъёс Ижкарын 9-тӥ тулыспалозь ортчозы. Куноосты латиноамериканской, вегетарианской, нордической но мукет пельнянь кутыны дышето. Фестивальлэн валтӥсь ужрадэз луоз пельнянь сиёнъя рекорд пуктон — 11-тӥ тулыспалэ Шор площаде вань мылкыд карисьёсты ӧтё.