Ижкарлэсь нуналзэ 3 нунал ӵоже пусъёзы

Ижкарлэн нуналэзлы сӥзем празникын Кристина Орбакайте  кырӟалоз. Шулдыръяськонъёсты радъясь комитетлэн  кенешонэз бере со сярысь элькун тӧролэн но кивалтэтлэн администрацизылэн кивалтӥсез Сергей Смирнов ивортӥз. Концерт 20 час 45 минутэ тыметлэн ярдураз кутскоз.

Туэ Карлэсь нуналзэ пусъёнэз радъянъя мер комитет кылдытэмын вал. Со карыны улӥсьёслэсь 81 куриськонзэс кутӥз, со пӧлысь 58-сэ улонэ пыӵатозы. Со пӧлын азбар шудонъёсъя «Счастливый город Берша-сити» фестиваль, Ленин ёросын «Ёрослэн уез», Бадӟым хор собор,  «Матрёшка-фест» йӧскалыккуспо фестиваль,  «Открытый город» фестиваль но мукет.

«Кӧня ке ар талэсь азьло ми Азбарлэсь, Ёрослэсь, Карлэн но Россилэсь нуналзэс пусйыны кутскимы. Со калыклэсь кичӧлтонъёссэс быдэстыны умой луонлык.  Туж кулэ сыӵе ӵектонъёслы юрттыны, кудъёссэ адямиос асьсэос дась улонэ пыӵатыны», — вераз Сергей Смирнов.