Ижкаре вуылӥз Кубалэн Россиын ужась посолэз
«Милемыз Удмуриен герӟало тунсыкъяськонъёсмы. Кылсярысь, Кубаын улисьёслы кельшо татын поттэм автомашинаос. Тужгес но ушъяло Ладаез», — шуиз Кубалэн посолэз Херардо Пеньяльвер Порталь.
Соин ик делегация вуылыны чакла Ижкарысь автозаводэ. Та арын Кубаысь кивалтӥсьёслэн малпаназы 500 пала выль автомашинаосты басьтыны.
Со сяна, Кубаысь делегацилы тунсыко промышленной, му вой поттонъя предприятиос, гурт возёс удыс. Кызьы вераз Херардо Пеньяльвер Порталь, соос дорын но та ӧръёс азинско. Соин ик азьпалан асьме продукциез Кубае келяны сюресъёс усьтӥськозы, нош Кубаысь – зарезь сиёнэз, кофеез – асьме доры.
Кубаысь посол ИЗО-я элькун музейын улосчиезлэсь Омар Годинес суредасьлэсь адӟытонзэ усьтӥз. Экспозициын — монотопия амалэн быдэстэм 40 пала ужъёс.