Ижкар — лыдӟиськись кар
6-тӥ сентябре валтӥсь ужрадъёс кутскемынэсь ӧй вал на ке но, адямиос мыло-кыдо поръязы ни лыдӟиськон дуннелэн урамъёстӥз: одӥгъёсыз фестивальлэн борддорез вылэ ки пытьыоссэс кельтӥзы, мукетъёсыз пӧртэм мастер-классъёсы пыриськизы.
Выль тодон-валан книгаын гинэ ӧй вал, фестивалез радъясьёс туж узыр программа дасяллям. Ижкарын улӥсьёслы но куноослы, нош соос паркын та нуналъёсы лачак вал, 3 нуналлэн котькуд часэз мар ке но тунсыкозэ кузьмаз.
1-тӥ нуналаз ик удмурт писателен Вячеслав Ар-Сергиен пумиськон ортчиз. Со аслаз «Перекрёстки» выль книгаеныз тодматӥз. Отчы веросъёс, киноповесть но эссе пыризы. Улонысь учыръёс, тунсыко тодэ-ваёнъёс, лыдӟиськисьёсын кенешонъёс — таин пыӵаз пумиськон.
Кемалась ик ӧвӧл, удмурт калык выжыкылъёсын, мифъёсын но легендаосын книгалэн 3-тӥ изданиез потӥз. Соин фестивальысь калыкез тодматӥзы Флор Васильев нимо библиотекаын ужасьёс. «Удмуртия» издательстволэн дизайнереныз Юрий Лобановен ӵош дэмлазы удмурт фольклоре зымыны. Та книгалэн 2-тӥ изданиезлы суредъёсты дано удмурт художник Менсандык Гарипов быдэстӥз вал.
Книга выль ке но, со бордын тыршисьёс азьвыл туссэ утьыны тыршиллям. Бамъёсты азьло сямен ик Гариповлэн иллюстрациосыныз тырмытӥллям.
— Менсадык Гарипов бадӟым данъяськонмы, — сюлмысь вераз Юрий Лобанов. — Со туж мур шӧдэ вал удмуртъёслэсь пуш дуннезэс, улонзэс, нош фольклорлэсь кылдытэм книгаослы ӵапак сыӵе вашкала дуннеез возьматӥсь суредъёс кулэ.
Солэн творчествоезлы али но вылӥ дунъет сёто, Москваысь Третьяковской галереялэн коллекцияз но ужъёссэ утё.