Ия Питиримова – Эгра ёросысь анай кылэз дышетонъя тужгес устоез визьнодась

Анай кылын ужась тужгес усто ӧнерчиез быръён ужрад Эгра ёросын нырысьсэ ортчиз. Куспазы вожвылъяськизы школаосысь удмурт кылъя дышетисьёс но нылпи садъёсын ужась воспитательёс.

Конкурслэн берпуметӥ люкетаз потэм 4 ӧнерчиос жюриез ужан амалъёсынызы тодматӥзы, мастер-классъёс ортчытӥзы. Тужгес секытэз вал, дебатъёсы пыриськон — дэмлам ужпумъёсъя кенешон но ас малпандэ утён.

Жюри тужгес усто ӧнерчиен нимаз Эгра каргуртысь 9-тӥ нылпи садысь ӧнерчиез Ия Питиримоваез. Солэн тужгес умоен лыдъямын нылпиослы дасям шудонэз, мастер-класс возьматэмез но котькыӵе юанлы рос-прос валэктон сётыны быгатэмез.

«Мон нылпи садын 30 ар ужасько ни, — шуэ Ия Питиримова. — Нылпиосты удмурт кыллы дышетӥсько. Бадӟым саклык висъясько удмурт лулчеберетэн тодматонлы. Уж нуисько проектъёс кылдытонъя но. Отын ми  удмурт йылолъёсты эскериськом».

Финалэ потэм котькуд ӧнерчилы Эгра ёросысь дышетонъя управление нимысьтыз кузьымъёс дасяз. Нош вормисьлы — Элькун ужрадэ пыриськыны луонлык сяна, коньдон кузьым но сётизы.