Иосиф Наговицын вордӥськем дырысен туннэ 130 ар тырме
Сӥё-дано ужрадэ пыриськизы культурая но туризмъя министр В. Соловьёв, Кун Кенешысь ялан ужась комиссилэн кивалтӥсез Т. Ишматова, Кун Думаысь депутатлэн юрттӥсез А. Юрпалов, К. Герд нимо музейлэн директорез А. Волков, И.Наговицынлэн ӵыжы-выжыосыз, «Удмурт Кенеш» огазеяськонлэн активистъёсыз, журналистъёс но трос мукетъёс. Нимысьтыз делегация вуиз И. Наговицынлэн вордӥскем палъёсысьтыз, Глазов ёросысь.
— Иосиф Наговицын трос аръёс ӵоже кунгож сьӧрын улӥз ке но, вордӥськем шаераз берытскиз, удмурт калыклэн улоназ, удмурт музъемлэн азинсконаз туж бадӟым пытьы кельтӥз. Со туж визьмо, кыдёке азьлане учкыны быгатӥсь, калыклэсь кулэяськонъёссэ валась адями вал, — пусйиз Татьяна Ишматова.
— Ваньмыз, кин татчы лыктӥз, мон понна туж матысь эшъёс, — пусйиз И. Наговицынлэн ӵыжы-выжыез Валентина Хазиахметова (Татарстанлэн президентэзлэн советникез луыса ужамын) — Озьы пӧрмиз: мынам улонэ ортчиз Татарстанын. Та республикаын 1990-тӥ аръёсы калыклы улон-вылонын юрттонъя туж ӟеч программа ужаз. Со быдэсак лэсьтӥськиз, И. Наговицинлэн ужъёсыз вылэ пыкиськыса. Али но Татарстанын ужъя министерстволэн ужрадъёсыз ортчо ке, сцена вылын одно ик И. Наговицинлэн портретэз ошемын луэ. Угось быдэс Россын та адямилэн но политиклэн ужъёсыз туж бадӟым инты басьто.
Иосиф Наговицын 49 ар гинэ улӥз, но 500-лэсь трос пӧртэм ужъёс лэсьтыса вуттӥз. Ваньзы сямен ик соос сӥземын кунэз радъянлы, калыклэсь улонзэ азинтонлы.
Жаляса верано, берло аръёссэ И. Наговицинлэн нимыз республикаямы вуныны кутскиз. Но бадӟым юбилейлы сӥзьыса, шаерамы ортчозы на пӧртэм ужрадъёс, радъяськоз нимысьтыз бадӟым конференция.