«ИнстаЧебераез» бырйизы
Марафонэ пыриськисьёс «Мон удмурт» темая пост-визитка гожтӥзы. Асьсэ сярысь, удмуртлыкен герӟаськемзы сярысь мадизы. Собере дорзылэн чеберлыкез сярысь веразы, гуртысьтызы адӟем карымон адямиосынызы тодматӥзы. Тросэз пусйизы, дор — со семья, нош семья — со кужым люкан инты шуыса. «Выж герӟет» тема улсын сям-йылололъёсты тодазы вайизы. Кин ке но выль семья кылдон, кин ке но азбаразы сылӥсь куала сярысь, кин ке но гуртазы ортчись праздникъёс сярысь мадиз. Удмурт кибашлы нылъёс быгатонлыкъёссы, улоназы кутӥськись лайфхакъёс сярысь но гожтӥзы, вотэсысь бамъёсазы мастер-классъёсын видеоос тыризы.
ᅠ
«Нылъёс туж видеоужъёсынызы паймытӥзы но шумпоттӥзы. Со понна гинэ но кулэ вал та марафонэз ортчытыны. Таӵе арбериос уг тырмо удмуртлыкын», — вера Богдан Анфиногенов.
Видеосуредъёссы понна Можга ёросысь Милана Тарасовалы, Дэбес ёросысь Елизавета Кожевниковалы, озьы ик Татарстанысь Кукмор ёросысь Екатерина Фёдоровалы но Балтач ёросысь Александра Раимовалы со нимысьтыз кузьым дасяз.
Озьы ик пусъемын вал гожъяськись анайёс. Котькуд постъёсазы соос нылпиоссы, семьязы сярысь гожъяны тыршизы.
«ИнстаАнай» ним басьтӥзы Алнашысь Екатерина Русаева, Ижкарысь Наталья Образцова но Надежда Жуйкова. Мукет нылъёс но кузьымтэк ӧз кыле. «ИнстаЧеберай» конкурсэз нуисьлэн Анастасия Пушкиналэн верамезъя, тросэзлы вожвылъяськонэ пыриськисьёслы спонсоръёс пӧртэм кузьымъёссэс кузьмазы.
Нош вормисез ини жюри дунъяз. Вакчи дыр куспын соос огкылысь Башкириын вордскем но али Ижкарын улӥсь Наталия Романовалы нырысетӥ интыез но «ИнстаЧеберай» нимез сётӥзы. Ваньзы удмурт кылын вольыт гожъяськемезлы, мур пуштросо ивортонъёсызлы но ӟеч туспуктэмъёсызлы синмаськизы.
Вожвылъяськонын кыкетӥ инты но «ИнтсаДыдыкай» ним басьтӥз Дэбес ёросысь Уйвай гуртын будэм Мария Емельянова, куинетӥ инты но «ИнстаМусокай» ним сётӥзы Алнашысь Анастасия Васильевалы. Со сяна, нимысьтыз «ИнстаУстокай» нимен пусъемын Кез ёросысь «Живица» этнокомплекслэн кузёез Екатерина Лекомцева.