«Ингур» но «Виват» нылпи хоръёс «Мужское певческое братство» VI Росси фестиваль-конкурсэ пыриськозы

Фестиваль-конкурс Удмуртиын 22-тӥзэ радъяське. Туэ отчы 8 аресысен 80 аресозь 500-лэсь ятыр пияшъёс но воргоронъёс пыриськозы. Огез сое радъясь луэ «Ингур» хорлэн кивалтӥсез Валерий Митрофанов.

Солэн верамезъя, Искусствоя элькун школаысь коллектив ӝыны Европаез ортчиз ини. Трос калыккуспо конкурсъёслэн лауреатэз луиз.

«Милям валтӥсь вормонмы — со Венаын, дуннелэн крезьгуръя шоркараз утэм зарни кубокмы. Со тужгес дано конкурс. Ми отын зарни кубок басьтӥм. Со ми понна вылӥ данъет. Жюри нырысьсэ, 37 конкурс ортчытыса, кык зарни кубок сётоно луиз. Венаысь но милям хормы зарни кубок басьтӥзы», — пусйиз со.

«Ингур» хор трос гинэ устолыко пиналъёсты будэтӥз ини. Огез соос пӧлысь, Семён Байкузин, туннэ Удмуртиысь кырӟанъя но эктонъя «Италмас» ансамбльлэн лулчеберетъя кивалтӥсез луэ. Нош таяз фестиваль-конкурсын со огазеям хорен кивалтоз.

18 ар ӵоже ини фестиваль-конкурсэ пыриське Ижкарысь Искусствоосъя 8 номеро нылпи школаысь «Виват» коллектив.

«Нырысь ик 8 адями ми вал. Нош али ми 60 кузя, — вера «Виват» хорлэн кивалтӥсез Майя Чистякова. — Ми группаослы люкемын. Вань быдэ вуымтэ пиослэн хорзы, вань покчи пиослэн хорзы, 3-тӥ, 4-тӥ, 5-тӥ, 6-тӥ классъёслэн но тэшкылиослэн. Ми ваньмы «Виват», мукет кыӵе ке группаослы люкиськеммы уг поты. Со милям одӥг коллективмы, кудӥз бордын кык дышетӥсьёс ужало, кык хормейстеръёс».

Фестиваль-конкурсэ «Виват» хорлэн вань группаосыз пыриськозы. Майя Чистяковалэн верамезъя, пиослэн хорзы нылъёслэн хорзылэсь трослы висъяське.

«Мон 25 ар ӵоже нылъёсын ужай. Нош куке пиосын ужаны кутски, валай куаразыя. Соос туж золэсь, туж мыло-кыдоесь, соослэн куараоссы трослы юнэсьгес, нылъёсын ӵошатыса. Соос пушкы сыӵе кужым пыртэмын. Лулчеберлыко кужым», — валэктэ со.

Озьы ик Чистякова пусъе — пиослэн хоренызы ужан туж тунсыко радъяськыны кулэ. Угось пиослы тунсыко ӧз ке луы, соос футболэн, теннисэн шудыны кошкозы. «Виват» коллективлэн шыкысаз Туннэ нуналлы 7 Гран-приззы ини.