Гужем Ижын ужалоз нырысетӥез удмурт видеошкола
Егитъёслэн видеошколаязы дышетӥсьёссы но егитэсь. «Куара» огинлэн кивалтӥсез Владислав Степанов монтажёръёслэн дышетӥсьсы луоз. Со «Куара» огазеяськонлэн проектъёсызлы монтаж лэсьтэ, фин-угор кинофондлэн кинематографияя калыккуспо школаяз дышетскемын, удмурт пиналъёсты «Шундыкар» лагерьын видео пуктыны дышетэ.
— Улон воштӥськемен, медиа азинске — удмурт культураез азинтон понна сое вотэсын вӧлмытоно, — вера В. Степанов. — Учкымон, «ческыт» видео лэсьтыны капчи ӧвӧл. Соин ик группаенымы нырысь-валысь монтажен вырыны дышетском, собере, видеосуредъёсты кышъяса, клипез йылозяз-пумозяз вуттом.
Операторлэсь ужзэ оскалтыны мылкыд карисьёсты дышетоз Пётр Иванов. Со моушн-дизайнэн выре, видео пуктэ, бадӟым компаниосын ужа. Егит ӧнерчи тылэз но буёлъёсты радъяны, чебер композиция пуктыны, техникаен шонер ужаны дышетоз. Со сяна, видео удысысь туала трендъёсын тодматоз.
Сценарий гожъясьёс ужалозы Анастасия Шумилова кылбурчиен — со берло дыре драматургиен тунсыкъяськыны кутскиз.
— Клипез кылбурен ӵошатыны луэ, — вера А. Шумилова. — Та пичи жанръёсын номыр мултэсэз луыны кулэ ӧвӧл. Ваньзэ меӵак верад ке — мӧзмыт луоз, укыр визьмояськид ке — валантэм. Оскисько, ӵошен кылдытом котькуд сюлмез ӵабыштыны быгатӥсь сценарий.
«Тамгаын» дышетскон дунтэк луоз: проектэз улонэ пыӵатыны юрттэ Нациосын ужан политикая министерство. Видеошколаын дышетскисьёс удмурт кылэз тодыны кулэ. Со сяна, студентъёсты бырйыку, чаклазы соослэсь та удысын азьланяз тыршыны мылкыд каремзэс. «Тамга» видеошколалэн кивалтӥсез Ольга Степанова верамъя, видео удысын вырись ӧнерчиос туж кулэ.
— «Куара» огинэн пӧртэм пумо, ӟеч видео лэсьтэммы потэ, — вера О. Степанова. — Ужаны кутским но, кылдӥз секыт югдур: удмурт кылын видео лэсьтыны быгатӥсьёс туж ӧжыт. Соин грант чотын быдэсъяськись нырысетӥез проектмы — удмуртъёслы видеошкола. Озьы ми асьмелы юрттӥсьёс, кивоштӥсьёс будэтом. Оскиськом, та проектмылы луыса тросгес адями та удысэ кыстӥськоз.
Пӧрмоз-а нырысетӥез удмурт видеошкола — адӟом гудырикошконлэн пумаз. Соку егитъёс «экзамен сётозы» — клипсэс возьматозы, нош калык «лайкъёсын» дунъялоз огазьын быдэстэм ужзэс.