Григорий Симаковлэн юбилеез улсын конференци ортчиз Ува ёросын

Григорий Симаковлэн нимыныз пукон- лыдӟиськон инты усьтӥзы Красное черкогуртысь культура юртлэн азбараз. Пуктӥськемез усьтон йылпумъяз «Писатели Удмуртии — детям» нимо элькун конферециез.

Конференцилэн ужаз элькунысь тодосчиос, гожъяськисьёс, дышетӥсьёс пыриськизы.

«Туж тунсыко вал — пуштросо — научной докладъёс Виктор Леонидович Шибановлэн но Александр Григорьевич Шкляевлэн. Нимысьтыз нылпи литература сярысь, удмурт нылпи литература сярысь, кыӵе асьмелэн принципъёсмы, кыӵегес проблемаосмы шараязы. Соин ик конференци сыӵе пуштросо, но со дыре туж сюлмо пӧрмиз», — вера  Татьяна Ишматова, «Удмурт Кенеш» огазеяськонлэн тӧроез.

Григорий Симаковез «удмурт Пришвин» шуо. Туэ солы 100 арес тырмысал. Со улсын Ува ёросын пӧртэм ужрадъёс ортчо. Тужгес но трос «Красносельское» муниципал кылдытэтын. Ӵапак отчы писательлэн вордӥськем гуртэз — «Рябиновка» — пыре.

Симаковлэн инкуазь сярысь гожъямъёсыныз тодматскон но солэсь нимзэ калык полы вӧлмытон бордын библиотекаын ужасьёс но трос тыршо. Туэ Симаковлэн веросъёсызъя лэсьтэм киужъёсын но суредъёсын вожвылъяськон ялэмын. Отчы мыло-кыдо пырисько нылпи садэ ветлӥсь покчиос но школаын дышетскисьёс.