Грак школаын йӧскалык лулчеберетлы сӥзем «Радуга дружбы» фестиваль ортчиз

Ужрадлэн валтӥсь мугез – Грак ёросын улӥсь выжы калыкъёслэсь лулчеберетсэс утён.

«Фестивальлы школаосын дасяськон толэзь ӵоже мынӥз, — шуо фестивале пыриськисьёс Виноградова Екатерина, Минеева Анна но Ефремова Виктория. – Туэ 5-тӥ классын дышетскисьёс пор но удмурт выжыкылъёсъя возьматонъёс дасязы, 6-тӥ классъёс – крашинъёслэсь, чувашъёслэсь но ӟучъёслэсь сиёнзэс пӧразы, 7-тӥ классъёс – чуваш, крашин но удмурт калыкъёслэсь кырӟан-эктонъёссэс возьматӥзы, 8-тӥ классъёс – ӟучъёслэн, поръёслэн но удмуртъёслэн сям-йылолъёссы сярысь веразы.

Котькуд класс мыло-кыдо дасяськиз ужрадлы. Соин ик фестивальын трос гинэ яркыт но тунсыко номеръёс вал. Залын шумпотон, эшъяськон, огазеяськон мылкыд поръяз.

Фестиваль этно-дискотекаен йылпумъяськиз.