«Горд гвоздика» гадьпус басьтыса, юрттод ветеранъёслы

2 толэзь ӵоже волонтёръёс ветлозы ульчаостӥ, паркъёстӥ, трос калыко интыостӥ но адямиослы басьтыны дэмлалозы «Горд гвоздика» гадьпус. Озьы ик Ижын горд гвоздикаен гадьпусэз луэ басьтыны «Магнит», Sela вузкаронниосысь но «Лукойл» заправкаосысь. Вань бичам уксё мыноз ветеранъёслы юрттон вылысь.

«Память поколений»  фондэн кивалтэ нырысетӥ нылкышно космонавт Валентина Терешкова. Фонд 3-тӥ арзэ ужа ни, та дыр ӵоже 6 сюрс пала ветеранъёслы юрттӥз ни: кинлы ке кузьмамын кресло-коляскаос, висьыса кыллисьёслы чаклам кровать, кинлы ке уксё висъямын протез пуктон, эмъюм басьтон понна. Уго Быдӟым ож, Афганистанын, Сириын ожъёс пыр потэм, Уйпал Кавказын террористъёсын нюръяськыку сӧсырмем ветеранъёслы ялан тазалыксэс юнматоно луэ, со понна трос уксё кулэ. Котькуд мылкыд карись, «Память поколений» фондлэн вотэсбамаз пырыса, ветеранъёслы юрттон вылысь уксё келяны быгатэ.