Глазкарысь Елизавета Третьякова финн-угор чеберайёслэн вожвылъяськоназы пыриськоз
Нылмурт творчествоен вырын яратэ. Елизавета крезьгуръя школаез фортепиано классъя йылпумъяз. Кырӟанъя калыккуспо но огъяросси телеконкурсъёсы пыриськылӥз. Елизавета вордскем шаерзэ, Удмуртиез, яратэ но ас выжыосызлэсь йылолъёссэс азьланьтэ,
— верамын вожвылъяськонэ пыриськисен тодматонын.
Сизьыметӥез «Мисс студенчества Финно-Угрии» вожвылъяськон 20–25 куартолэзе Йошкар-Олаын ортчоз. Ужрадэ Финн-угор университетъёслэн ассоциязы пырись Россиысь сизьым вылӥ дышетсконниосысь студенткаос пырисько.
Тодэ вайытом, финн-угор чеберайёслэн вожвылъяськоназы озьы ик пыриськоз Удмурт кун университетын дышетскись Евгения Аркова.
Нылъёс 6 эскеронъёс пыр ортчыны кулэ: ас калыкен тодматон (видеопрезентация), йӧскалык дӥськутэн ветлон, «Рождение костюма» вожвылъяськон-тодматон, тврчествоя номер возьматон (котькыӵе ӧръя), визьсынан конкурс, йылпумъян дефиле.
Вормисьёслэн нимъёссы 25-тӥ куартолэзе тодмо луозы.
Нялтас вераса, туннэ ини вожвылъяськонэ пыриськисьёс понна вотэсын кура сётон мынэ. Асьме нылъёс понна дурбасьтыса, «Мисс Медиа» номинациын вормыны юрттыны быгатӥськомы.
Ватсалом, кылем арын «Мисс студенчества Финно-Угрии» вожвылъяськон Глазкарысь Лия Стрелкова «Мисс Дружба» ним басьтӥз.
Тодэ вайытом, чеберайёслэн вожвылъяськонзы мынон нуналъёсы ик, 24–26 куартолэзе, Йошкар-Олаын «Финн-угор калыкъёслэн узырлыксы» калыккуспо форум ортчоз. Отчы Удмуртиысь 30-лэсь трос студентъёс куриськон сётӥзы.