Глазкарын азербайджан культуралы сӥзем нуналъёс мыно

Глазовысь "Одлар юрду" азербайджан огазеяськонлы луыса, карын улӥсьёс та выжы калыклэн узыр, чебер, тунсыко лулчеберетэнызы матэгес тодматскыны быгато.

«Азербайджан культуралы сӥзем нуналъёс улсын Глазкарысь лулчеберетъя юртъёсын, школаосын, нылпи садъёсын пӧртэм ужрадъёс ортчылозы. Нош со – адӟытонъёс, кенешонъёс, пумиськылонъёс но мукет,  – вера «Одлар юрду» огазеяськонлэн кивалтӥсезлэн воштӥсез Бахтияр Рафиев.

– Та нуналъёсы шаертодонъя музейын асьме калык дӥсьлы сӥзем «Краски Азербайджана» нимо выставка ужа. Мар со яйлыг? Маин висъяське архалыг чухалэсь? Та но мукет юанъёслы валэктонъёс шедьтыны луоз ӵапак та адӟытонын. Со 18-тӥ коньывуонозь ужалоз».

Озьы ик  Глазкарын улӥсьёсты но куноосты «Последний Орфей» нимо  тодэ ваён ӝытэ ӧтё. Со сӥземын луоз СССР-ысь калык артистлэн, кырӟасьлэн но композиторлэн Муслим Магомаевлэн улэм-вылэмезлы. Ужрад ортчоз лулчеберетъя но спортъя «Победа» центрын 16-тӥ коньывуонэ 16 часын.

«Нош 18-тӥ коньывуонэ Глазовысь Калыкъёслэн Эшъяськон юртазы «Путешествие по Азербайджану» нимо туспуктэмъёсын адӟытон усьтӥськоз. Фотоужъёсын Азербайджанысь  вань улосъёс возьматэмын луозы, – азьланьтэ Бахтияр Рафиев. – Туспуктэмъёс пыр кунмылэсь чеберлыксэ, аспӧртэмлыксэ возьматыса, Азербайджанэ вуылыны мылкыд карисьёслэсь лыдзэс будэтыны малпаськом».

Толэзь ӵоже тужгес но пичиосыз доры огазеяськонлэн ёзчиосыз «Мир азербайджанской сказки» но «Природа и животный мир Азербайджана» темаосъя пумиськылонъёсы поталозы.

Азербайджан культуралы сӥзем нуналъёс йылпумъяськозы Б.Рафиевлэн кылбуръёсъя «Трилистник» бичетэныз тодматскон ужрадэн.

Радъясьёс: Глазовысь “Одлар юрду” азербайджан огазеяськон

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий