«Гердлэсь мытэм ужзэ азьланьтӥськом»
Щеткина С.Г., Герд нимо Гурезь-Пудга шор ёзо школаысь историен но обществознаниен дышетись.
Куамын ар пала ини ужасько Кузебай Герд нимо Гурезь-Пудга шор-ёзо школаын. Пиналъёслы история но обществознание предметъёсъя визь-нод сётыны тыршисько, шаертодонъя кружок нуисько. Урокъёсме мон сётӥсько ӟуч кылын, нош урокъёс вискын пиналъёсын удмурт кылын но вераськисько. Удмурт гуртын улӥсько бере, удмуртлыке мыным ӵемысь юрттэ анай-атайёсты но умойгес валаны.
Туннэ ужрадмы нимамын «Кузебай Герд улэ асьмемын ӵош» шуыса. Зэмзэ но, со улэ асьмелэн ужъёсамы, удмурт кылмес, удмуртлыкмес утёнамы. Герд вань улонзэ сётӥз угось удмурт калыксэ дышетонлы, данъяськымон но паськыт визьлыкъем луыны.
Мынам вакчияк вераме потэ, мар лэсьтӥське милям школаямы, Кузебай Герлдэн вордӥськем палъёсаз.
Нырысь ик вераны кулэ удмурт кылмес, удмуртлыкмес утьыны тыршиськом шуыса. Ма пыртӥ со адске?
Дышетскон программая урокъёс нуон сяна, ми тыршиськом дасяны пиналъёсыз котькыӵе ӵошатсконъёсы. Тани ти, гажано тодосчиос, утчаськон – эскерон ужъёсын выриськоды, книгаос поттӥськоды. Нош ми, дышетӥсьёс, пиналъёсыз учебно-исследовательской ужъёс гожъяны, калык азьын йыг-йыг вераськыны дышетӥськом. Пинал исследовательёсмы Всероссийской конкурсъёсы но пыриськыло, вормисъёс пӧлы сюрыло. Нош ёросамы котькуд ар ортчытӥське «Старая фотография» ( «Вуж туспуктэм») , «Наукае нырысетӥ вамышъёсы» ёрос конкурсъёс, соослэн темаоссы арысь аре вошъясько.
Гурезь-Пудга шор ёзо школаын бадӟым саклык висъяны тыршиськом ас вордскем шаердэ но анай кылдэ яратонлы, сое нырысь ик пыӵатоно удмурт кыллы но литературалы, историлы но обществознанилы сӥзем урокъёсын. Школа кылзэ кутыны кулэ, дышетскисьёс ас вордскем шаерзэс яратыса, ог-огзэс гажаса, ужлэсь пайдазэ но кулэлыксэ валаса, выль луонлыкъёслы дась луыса мед будозы шуыса. Со ваньмыз анай кылэз, семьяез, дор палъёсыз яратон но гажан бордысь потэ.
Туала арын анай кылэз тодэм туж пайдаё! Со тужгес но шӧдӥське дышетскись пиналъёс вылын. Удмурт кылэз тодыса, пӧртэм конкурсъёсы но проектъёсы пыриськыны луэ. Нылпиос ас быгатонлыкъёссэс «Шундыкар» яке «Усточикар» лагерьёсын волятыны быгато, отын соос ужало но, шутэтско но, выль эшъёс но шедьто, озьы ик тодмо адямиосын пумиськыло. Со сяна, котькытчы вутскись, шаплы пиналъёс Г. Ходыревлэн нимыныз пусъем премиез но басьязы (2009-тӥ арын – Щеткин Андрей).
2017 арын егит усточиос Зайцева Даша, Садовникова Маша, Лукоянова Саша Москвае калыккуспо вожвылъяськонэ пыриськылӥзы. Крезен быгатыса шудэмзы но кырӟамзы II степенё Дипломен пусъемын вал. Котькуд ар пиналъёс мылкыд карыса шаертодонъя олимпиадае пырисько. 2017 арын Березина Ульяна элькунамы шаертодонъя олимпиадаын вормисъёс пӧлы шедиз. Соин луыса тямысэз пиналъёсмы Анапае Всероссийской лагерной сменае ветлӥзы. Отын соослэн эшшо но паськытаз тодон-валанзы. Дуннеез котыръянлэн тужгес пайдаё палыз пиналлэн малпаськон ӧрезлэн узырмемез бордын, со ас шаерез шоры мукет синмын учкыны кутске.
Асьме шаерамы тросэзлы тодмо Гурезь-Пудга гурт. Уго та паймымон чебер интыын Кузебай Гердлэн музей-юртэз интыяськемын. Музей кылдытыны кутскемын вал 30 ар талэсь азьвыл. Дышетӥсьёс но дышетскись пиналъёс ужазы со бордын, Егоров А.М. кивалтэм улсын. Котькуд ар, музей но школа валче кариськемен, Гердлэсь вордӥськем нуналзэ пусйиськом, Гердлы сӥзем лыдӟонъёс ортчытъяськом.
Та ужрадэ котькуд ар пырисько быдэс ёросысьтымы удмурт кылъя но литературая дышетӥсьёс но дышетскисьёс, бускель Ува ёросысь эшъёсмы но вуыло. Та ужрадэз ортчытъяськом удмурт кылын. Пиналъёс ужало пӧртэм секциосын, асьсэлэсь быгатонлыкъёссэс возьматыны тыршо кылбур гожъянын, пичиесь заметкаос, исследовательской ужъёссэс шараяло, эктыны – кырӟаны быгатэмзэс возьмато.
Уно аръёс чоже мылысь- кыдысь ужазы удмурт кылъя но литературая дышетӥсьёс Гурезь-Пудга школаын — Матвеева Е.И., Горшкова С. Н.- Кузебай Герд нимо ёрос премиен пусъемын, али соослэсь мытэм ужзэс азьланьтэ Широбокова Л.Г., Выль Бия школаын ужало Ефремова Н.М., Дягелева М.П., Зямбай школаын Шихова В.А., Капеева Н.Н., Брызгалово школаын Лесникова Ольга Владимировна, Большеволковской школаын Ганеев В.А.
Гердлы сӥзем лыдӟонъёсы арысь аре пырисько элькунысьтымы «Ӟечбур» газетысь корреспондентъёс но, соин ик милям матысь кусыпъёсмы радъямын та газетын ужасьёсын. Ӵемысь потало милям пиналъёсмылэн ужъёссы та газетлэн бамъёсаз. Нош 2014 арын школамылы 100 ар тырмонлы сизем номерез быдэсак Гурезь-Пудга школа сярысь вал. Дышетскисьёс но дышетӥсьёс удмурт кылын люказы ужъёссэс школамылэн историез но али улон вакытэз сярысь.
Данъяськыса верано луэ, музее школаын К. Гердлэсь улон сюрессэ но ужъёссэ дышетӥсь пиналъёс гинэ ӧвӧл, трос мукет адямиос но сюрес легизы ини. Ми доры ӵемысь вуыло кунгож сьорын улӥсь, тужгес но ӵыжы-выжы луись кунъёсысь Венгриысь, Финляндиысь, Эстониысь тодосчиос, дышетӥсьёс, студентъёс, малы ке шуоно К. Гердлэсь нимзэ умой тодо быдэс финн-угор дуннеын.
К.Герд удмуртъёс пӧлысь нырысетӥез луэ, кин кунгож (финн, немец) кылъёсыз дышетыны кутскиз. Туала арын будӥсь пиналъёслы сыӵе луонлык усьтэмын, соос кунгож кылъёсыз дышетыны кутско, кунгож сьӧры потаны но отын улыны но быгато. Ми палась сыӵе адямиос ӧжыт ӧвӧл ини. Марина Штыкова Германиын улэ, Лилия Каюкина -Франциын, Любовь Рябчикова, Ольга но Елена Зайцева, Апакова Люда – Финляндиын.
«Кӧня кылэз тодӥськод, сомында пол ик тон адями», – шуэ одӥгез лэчыт веран. Со нош ик тодамы вайытэ, одӥг кылэз тодэм вылэ дугдыны уг яра шуыса. Асьмелы одно ик умойгес луысал соку, куке шаерамы улӥсьёс ваньзы быгатыса вераськысалзы ке кыкеныз ик кун кылъёсын – удмурт но ӟуч! Соос возы одно ик кыӵе ке но кунгож кыл! Кылъёсыз дышетонлы тужгес ӟеч луонлык билингвизм дыръя кылдэ, куке пичи пинал вордскемез дырысен нуналысь нуналэ кык яке тросгес кылъёсын вераськемез кылэ ке. Туала гуртын, жаляса верано луэ, удмурт но ӟуч кылын одӥг кадьгес малы ке уг верасько ни.
Ас анай кылзэ, калыклэсь историзэ, культуразэ, вордскем интыосаз выжыяськем сямъёсты тодӥсь адями вань улонзэ семьяез, вордскем юртэз но гуртэз сярысь шуныт малпанъёсын улоз. Озьыен, адямилэн пыраклы пушказ кылёз ӵыжы-выжыосызлы, соослэн улон сямъёссылы, вордскем шаерзылы яратонэз но гажанэз.