«Герд лыдӟонъёсъя» нырысетӥез оргкомитет люкаськылӥз

«Башкирие ӵемгес асьмеос творческой коллективъёсты, ансамбльёсты гинэ поттаськом. Таӵе научной ужрад но соослы туж кулэ, дыр, — мылкыдзэ вераз Татьяна Ишматова. — Палэнын улӥсь удмуртъёслы со бадӟым юрттэт, нош «Герд лыдӟонъёслы» выль омыр, выль шокчон луысал».

Конференция Удмуртилэн кунлык басьтэмез дырысен 100 тырмонлы сӥзем улсын ортчоз. Соин ик вераськон татын мыноз мукет югдытӥсьёс сярысь но.

«Камсьӧрын туж гажало Максим Прокопьевез. Кылем арын солы сӥзем ужрад но ортчытӥзы. Каймашабаш школазы борды буре ваён пул шуккизы», — шуизы люкаськемъёс.

Озьы конференцилэн нимыз но ачиз вордӥськиз кадь, туэ со нимаськоз «Трокай Борисов, Кузебай Герд но Максим Прокопьев — Удмурт кунлыкез кылдытӥсьёс».

Ужрадын та темая докладъёс чузъяськозы, адӟытонъёс ужалозы, дышетскись пиналъёс понна квест ортчоз.

Нош тужгес но бадӟымез научно-практической конференциын котькуд ар луэ Кузебай Герд нимо йӧскалык премиез сётон. Данъетлэн лауреатъёсыз шараямын луозы берлогес.

«Удмурт кенеш» огазеяськонлэн ивортэмезъя