Герд, Ашальчи лыдӟонъёс… Кыӵе бадӟым ужрадъёслы дасяське «Удмурт Кенеш»?

Туэ соос ортчозы 21-тӥзэ. Быдэс элькунысьтымы куноосты пумитаны дасясько вавожъёс — ӵапак со палъёсын вордӥськиз удмурт азьветлӥсьмы Кузебай Герд.

15-тӥ тулыспалэ Вавож культурая юртэ 300-лэсь уно адямиос люкаськозы: пӧртэм тодосчиос, гожъяськисьёс, дышетӥсьёс но пиналъёс, К. Герд нимо премилэн лауреатъёсыз.

Дано удмурт адямиос лыдӟозы докладъёс удмурт калыклэн тодмо пиез сярысь. Отысен ик адӟыны луоз «Гердлы — 120» флешмобын лэсьтэм видеороликез.

Герд лыдӟонъёсысен ӟеч сямъя сӥё-дано пусъёзы К. Герд нимо премилэсь выльёссэ лауреатъёссэ: Надежда Пахомоваез но Вениамин Ившинэз.

— Вавожъёс рос-прос дасясько ини, — шуиз «Удмурт Кенешлэн» тӧроез Татьяна Ишматова. — Вань лыктэмъёсыз соос малпало люкыны 3 группаослы но нуллыны экскурсие ёросысьтызы огаз хозяйствое.

К. Гердлэсь сяна, туэ асьмеос пусъёмы на юбилейзэ нырысетӥ удмурт нылкышно кылбурчилэсь Ашальчи Окилэсь.

— Бадӟым ужрад чакласькомы ортчытыны кылбурчилэн вордӥськем нуналаз — 4-тӥ апреле — вордскем Грак ёросаз, — ивортӥз Т. Ишматова.

Озьы ик та вакытэ дасяськон уж мынэ 18-тӥ куартолэзе Елабугаын ортчоно конференцилы. Со сӥземын луоз Россиысь удмуртъёслэн нырысетӥ ӧтчамзы дырысен 100 ар тырмонлы.

Та ваньмыз ужрадъёс пыртэмын огъя планэ, соин Татьяна Ишматова но «Мынам Удмуртие» ТРК-ысь анай кылъя передачаос понна кыл кутӥсь Сергей Касаткин тодматозы Россиысь Фин-угор калыкъёслэн ассоциацизылэн президиумаз пырисьёсты.

Россиысь АФУН-лэн президиумез люкаськоз Марий Эллэн шоркараз — Йошкар-Олаын — 16-тӥ тулыспалэ. Отын фин-угор азьветлӥсьёс асьсэ ужрадъёссы сярысь ивортозы, кылем арын ужамзылы йылпумъянъёс лэсьтозы, калыкъёсмы азьын сылӥсь лэчыт ужпумъёсты сэрттон пумысен кенешозы.