Гербер ӝукез вӧсялозы Кузёбайысь вӧсясьёс

Кизёнлэн ӟеч йылпумъяськемезлы сӥзьыса Герберын вӧсяськон ортчыто, Тау каро вылӥ Инмарлы, Куазьлэн инмарезлы но музъем кылдытӥсь инмарлы – Кылдысинлы, шудбур, ю-нянь удалтон курыса. Герберын ӝукез вӧсян – вашкала дырысен утиськись йылол.

Ӝукез вӧсян ортче нимысьтыз дасям «Мудор» площадкаын. Таяз арын та вашкала йылолэз ортчытыны ӧтемын Алнаш ёросысь Кузёбай гуртысь куинь вӧсясьёс. Калыкъёслэн Эшъяськон юртысьтызы ӧнерчи Елена Келарева верамъя, вӧсясьёс Герберлы дӥсь дасязы ини – со луыны кулэ тӧдьы шортдэрем, малы ке шуоно инмаръёс доры вазиськыку чылкыт луоно.

Пусйыны кулэ, котькуд ар вӧсяськонэз ортчыто пӧртэм ёросъёсысь вӧсясьёс. Кылем арын ӧтчазы Кияса ёросысь Карамас-Пельга гуртысь вӧсясьёсты. Туэ Герберын соос асьсэлэсь ужзэс Алнаш вӧсясьёслы «выжтозы», вӧсям зундэс сётыса.

Удмуртиын Гербер элькун шулдыръяськон чотын 1992-тӥ арысен радъяське. Солэн валтӥсь ужпумъёсыз – удмурт калыклэсь аспӧртэмлыксэ утён, каръёс но ёросъёс вискын кусыпъёссэс юнматон но палэнын улӥсь удмуртъёсын вачеужанэз азинтон .