«Гербер» шулдыръяськон гудырикошкон толэзьлы выжтэмын луоз

Люди в национальных костюмах на празднике гербер

Удмуртъёслэн гырон-кизён быремлы сӥзем шулдыръяськонзы ортчоз ик, но со выль емышъёсыз октонлы сӥземын луоз

Элькун шулдыръяськонэз Удмуртилэн кунлыкезлы 100 ар тырмонэз пусъён улсын 20-тӥ инвожое ортчыны кулэ вал.

Быдэс Удмуртиысь но бускель улосвылъёсысь куноосты туэ Вавож ёрос пумитаны дасяськиз. Татын Удмуртилэн кунлыкез понна нюръяськись Кузёбай Герд вордскиз. Коронавирусэн йырин малпам ужрадъёс воштӥськизы, соин ик “Гербер” но гудырикошкон толэзе ортчоз – мукет пуштросэн но мукет ним улсын. “Гербер” интые та шулдыръяськон “Выль” (выль вуэм емышъёсты данъян праздник) нимаськоз.

Радъясьёс верамъя, “Выль” шулдыръяськонлэн форматэз “Гербер”-лэн выллем ик кылёз. Куноослы удмурт дуннелэсь узырлыксэ возьматозы но удмурт лулчеберетлэсь вашкалазэ, туннэ но азьпал улонзэ возьматозы. Ужрадын егитъёслы, семьяослы нимысьтыз площадкаос ужалозы, котькин но аслыз шулдыръяськыны инты шедьтоз, удмуртлыклэн туала улонэныз тодматскоз. Озьы ик шулдыръяськонлэн азьло тусбуез но кылёз: инкуазен огазе кариськон, гуртъёсысь вуэм коллективъёс, вӧсяськон но ӝук пӧзьтон. 2020-тӥ арын ортчись “Герберлэн” валтӥсь пуштросэз но кылёз. «Выль» шулдыръяськонлэн темаез – Вавож ёросысь воршудъёслэн историзы.

“Выль”-лэн аспӧртэмлыкез – калыккуспо площадкаос но вуэм емышъёсын ярмарка. Нырысьсэ удмурт калык шулдыръяськонын асьсэдыз Удмуртиын улӥсь мукет калыкъёс но возьматозы. Соосты озьы ик калык юмшанэ ӧтёзы, уго, асьсэ праздникъёссэс тросэз мукет арлы выжтӥзы.

Контентмейкер, мемолог и журналист

Дом Дружбы народов
Добавить комментарий