«Гербер» элькун шулдыръяськонэ 8 сюрслэсь трос адями люкаськиз
Удмуртилэн тӧроезлэсь ужзэ огдырлы быдэсъясьлэн Александр Бречаловлэн нимыныз люкаськем калыкез праздникен ӟечкылаз элькун тӧролэн но кивалтэтлэн администрацизылэн кивалтӥсезлэсь ужзэ быдэсъясь Сергей Смирнов. Со пусйиз, «Гербер» кемалась ни элькунлэн палэназ потӥз шуыса. Шулдыръяськонэ мукет улосвылъёсысь но делегациос вуо. Таяз ужрадэ лыктӥзы, кылсярысь, Свердловск улосвылысь но Башкортостанысь куноос.
Люкаськем калыклы озьы ик вазиськизы элькун кивалтэтлэн тӧроезлэсь ужзэ быдэсъясь Виктор Савельев, Кун Кенешлэн тӧроез Владимир Невоструев, Можга ёрослэн тӧроез Аркадий Вершинин но мукет кивалтӥсьёс.
Аркадий Вершинин тодэ ваиз Можга ёросын 25 ар талэсь азьло ортчем «Герберез», соку жаль-жаль зориз. Таяз радэ ӵукна зориз ке но, куазь оглом ӧз люкеты: шулдыръяськон ӧраз пырон вакытэ шунды пиштэ ни вал.
«Гербере» вуэмъёсты шумпоттӥзы творчествоя коллективъёс. Тужгес пиналъёсызлы — Уча черкогуртысь пиналъёслэн эктонъя «Топотушки» коллективзылы — Сергей Смирнов элькун тӧролэсь ужзэ огдырлы быдэсъясьлэсь кузьымзэ сётӥз, соос Москвае ветлыны быгатозы.
Праздникез усьтонын валтӥсь инты басьтӥзы «Детская новая волна» вожвылъяськонын вормись Арина Петрова но «Евровидениелэн» вице-чемпионъёсыз «Брангуртысь песянайёс».
Таяз арын «Герберлэн» валтӥсь темаез луиз вал. Ӵапак Можга ёросын будэто Горд Книгае пыртэм Ватка выжыысь валъёсты. Шулдыръяськонэ лыктэмъёс со валъёсын матэгес тодматскыны быгатӥзы.
Со сяна, праздникын пӧртэм площадкаос ужазы: «Усточикар», «Шудон азбар», «Кунокуа», «Батыр шудонъёс», «Азвесь геры», «Андан валъёс», «Шундэктон».
Радъясьёслэн верамзыя, 15 часлы празднике 8 сюрслэсь трос адями люкаськиз. «Герберлэн» историяз со тужгес бадӟым лыдпус.
Тодэ вайытом, 12-тӥ инвожое «Гербер» Ижкарын ортчиз. 1-тӥ пӧсьтолэзе шулдыръяськон Москваын радъяськоз.