Геннадий Красильниковлэн ужъёсызлы сӥзем адӟытон ужа Удмурт кун университетлэн лыдӟетъюртаз
Авторлэн матэктӥсь котырес лыдпусэзлы — 90 ар тырмонэзлы — тупатэм ужрадын солэн удмурт кылын гожтэм но ӟуч кылэ берыктэм произведениосыз но творчествоезъя эскерон ужъёс возьматэмын.
Ужъюртысь шаертодон, финн-угор но йӧскалык ваньбуръёсъя ёзэтлэн кивалтӥсез Наталия Самсоновалэн кылъёсызъя, книгаос, журналъёс но статьяос сяна, адӟытонэ ватсаса литератураен список интыямын.
«Кудъёссэ ми книгаосты, журналъёсты поттыны ум быгатӥське, интымы оло ӧжытгес луэ, соин ватсаса литература сётӥськомы ми озьы списокен. Лыдӟись ачиз мылкыд каремезъя мед быгатоз шедьтыны эшшо кулэ луись литература Красильниковлэн творчествоезъя», — шуэ Наталия Самсонова.
Со пусйиз, Геннадий Красильников удмурт литератураез но йӧскалык лулчеберетэз азинтонын бадӟым инты басьтэ. Солэн произведениосыз удмурт литературалэн зарни фондаз пыртэмын но туж паськыт вӧлмемын.
«Солэн геройёсыз туж яркытэсь суредамын, малы ке шуоно соос ваньзы огшоры адямиос, писатель ачиз но улӥз со калык пӧлын, соосты ик возьматэ аслаз ужъёсаз. <…> Тужгес яркыт талантэз шӧдӥськиз Красильниковлэн «Вуж юрт» повестяз. Со повестез ӟуч кылэ ачиз ик автор берыктӥз, ӟуч лыдӟись но туж вылӥ дунъяз писательлэсь та ужзэ», — вера Наталия Самсонова.
Кивалтӥсь пусъе, гожъясьлэн улон вакытаз но, туннэ но солэсь ужъёссэ яратыса лыдӟо. Со произведениослэн туала шӧмзы али но шӧдӥське, лыдъя Наталия Самсонова. Со сяна, Геннадий Красильниковлэсь творчествозэ школаосын но вузъёсын дышето.
Ватсалом, Геннадий Красильниковлы сӥзем адӟытон Удмурт кун университетлэн лыдӟетъюртаз пӧсьтолэзь пумозь ужалоз. Со сяна, матысь дыре ужъюртлэн сайтаз солэн виртуальной версиез шараямын луоз.
ВАТСАН
Удмурт литератураысь классик Геннадий Красильников 7-тӥ пӧсьтолэзе 1928-тӥ арын Алнаш черкогуртын крестьян семьяын вордскиз. 1957-тӥ арын Литературая А. М. Горький нимо институтэз йылпумъяз. Удмурт АССР-ысь гожъясьёслэн огазеяськонзылэн правлениезлэн тӧроез вал. РСФСР-лэн Вылӥ Кенешезлэн депутатэз, Удмурт АССР-лэн Вылӥ Кенешезлэн депутатэз но солэн тӧроез вал.
https://udmurt.media/udm/news/kultura-i-turizm/38201/