Фольклоръя коллективъёсын кивалтӥсьёс понна удмурт кырӟанъя дышетон ортчиз Удмуртиын

«Таиз семинар вал сӥземын калык кырӟанлы. Кырӟан жанрлэн аслаз поджанръёсыз вань: армие келян, сюанъёс дыръя быдэсъян но мукет. Тӥни соослэсь аспӧртэмлыксэс эскерим», — вераз Калык творчествоя юртысь лулчеберетъя ваньбурлыктэм кылёсбуръя ӧнерчи Вероника Фёдорова.

Солэн кылъёсызъя, совето вакытэ фольклорез мукет сямен берыктӥзы, соин ик со аслэсьтыз пуштроссэ ыштыны кутскиз. Йӧскалык лулчеберетэз утён понна Калык творчествоя юртын ужасьёс элькунысь фольклор удысын тыршисьёс понна семинаръёс ортчытъяло но соосты шонергес ужаны дышето.

«Фольклоръя коллективъёслы кулэ фольклорез возьматыны сцена вылын, солэн аслаз аспӧртэмлыкъёсыз вань. Мар яра сцена вылын возьматыны, мар уг яра. Кытӥяз тунсыкогес учкисьлы мед луоз шуыса, соос возьматъяло сыӵе элементъёсты, кудъёсыз воксё ӧй вал йылолын яке фольклорын, яке удмуртъёс озьы уггес каро вал», — шуиз Вероника Фёдорова.

Ӧнерчи верамъя, вуоно арын фольклоръя дышетон Эгра ёросын радъяны чакламын. Со сяна, элькунысь фольклор удысын тыршисьёс Ижкаре арлы быдэ ортчись элькун форуме люкаськозы.