Финн-угор конгрессъёс – калык дипломатиез азинтон
Конгрессын финн-угор но самоди калыкъёслэсь кылзэс но лулчеберетсэс утёнэн но улӟытонэн, выжы калыкъёслэн но ӧжыт лыдъем калыкъёслэн эрикрадъёсынызы герӟаськем ужпумъёсты эскеризы. Форуме 500 пала адями люкаськылӥз, 9 адями удмуртъёслэсь ыстэмын вал – ивортэ «Удмуртия» агентство.
«Трос юанъёс вал делегациез кылдытон, Конгресслэн ужанрадлыкез пумысен. Зэмзэ верано ке, ми та Конгресслы бадӟым саклык висъяськомы. Кунысьтымы политикая югдурез лыдэ басьтыса, ми пӧртэм тулкымъяськонъёсын мынӥмы. Ми валаськомы вал, ми та Конгрессын огшоры делегатъёс гинэ ӧвӧл, удмурт калыклэн ыстэм муртъёсыз гинэ ӧвӧл, ми Россиын улӥсь финно-угръёс. Милемлы ас калыкмес умой возьматыны кулэ вал. Мон малпасько, ми со ужоскетэз туж умой быдэстӥмы. Делегациысьтымы 3 профессоръёс (Наталья Кондратьева — кылосбур тодосъя доктор, УдГУ-ысь Удмурт кылосбуръя, финно-угроведениея но журналистикая институтлэн кивалтӥсез, Николай Стрелков — эм тодосъя доктор, Ижысь кун эм академилэн кивалтӥсез, Алексей Загребин — истори тодосъя доктор, Россиысь наукаосъя академилэн Урал ёзэтысьтыз Историяя, кылъя но литературая Удмурт институтлэн кивалтӥсез — ред.) ас удыссыя туж усто докладъёс лэсьтӥзы… Берытскимы ӝутскем мылкыдын, финн-угор калыкъёсын кусыпъёс вань, валче ужан азьланьтӥськоз», — вераз журналистъёслы Татьяна Ишматова.
«Удмурт Кенешлэн» тӧроез озьы ик пусйиз, Конгресслэсн пуштросэз шӧдскымон умойгес луиз шуыса. Кенешонъёс кӧня ке секциосын мынӥзы. Алексей Загребин доклад лэсьтӥз одӥгез тужгес секытэз ӧръя — «Граждан общество но тӧрлык». Нялтас вераса, со таӵе Конгрессэ нырысьсэ пыриськиз.
«Со секция, кудаз мон пыриськи — «Граждан общество, но тӧрлык» — туж лэчыт луыны кулэ вал. Малы ке шуоно калыклэн но тӧрлык ёзэсъёслэн кусыпъёссы туж ӝог чигыны быгато. Макем умой соос быгатозы куспазы вераськыны, сокем пайдалыко азинскоз йӧскалык ужпумъёсъя, лулчеберет, экономика удысъёсъя кун политика, угось мерлыко улон но экономика люконтэм луо. Нырысь учкыса, ми туж сюбег ужпумъёсты ӝутӥмы, кадь, со йӧскалык праздникъёс, этнотуризм, инкуазез утён, демография. Но озьы-а, тазьы-а, одно ик экономика ужпумъёс, пӧртэм институтъёслэн кусыпъёссы вылэ вуылӥмы… Ужъюлтошъёсын вераськыса, мон валай: бен, ми пӧртэм адямиос, милям пӧртэм малпанъёсмы луыны быгато, но куке ми огинэ люкаськиськомы, ми ас калыкмылэсь тунсыкъёссэ возьматыны тыршиськомы», — вераз Алексей Загребин.
«Удмурт кенеш» финн-угор движениез вӧлмытыны, калыкъёслэсь кусыпъёссэ юнматыны, калыкъёс сярысь тросгес ивортодэт сётыны ужпум пуктэ.