Финн-угор калыкъёслэн дунневыл конгрессазы Удмуртиысь делегацилэн ёзчиосыз ивортонъёс лэсьтозы

Кенешонъёсын финн-угор но самодий кылъёсты дышетон но улонын кутон, граждан обществолэн но тӧрлыкъёслэн кусыпъёссы, экономика но инкуазь, дмография но миграция ужпумъёс сярысь вераськозы.

«Удмуртиысь делегацилэн ёзчиосыз йӧскалык интеллигенциез дасян (Наталья Кондратьева, УДГУысь Удмурт кылосбуръя, финно-угроведениея но журналистикая институтлэн кивалтӥсез), финн-угор калыкъёслэсь мерлыко огазеяськонъёссэс азинтон (Алексей Загребин, Россиысь наукаоссъ академилэн Урал ёзэтысьтыз Историяя, кылъя но литературая институтлэн кивалтӥсез), калыклэн тазалыкез (Николай Стрелков, Ижкарысь кун эм академилэн кивалтӥсез) сярысь ивортонъёс лэсьтозы. Кенешонъёслы йылпумъянъёсъя резолюциос кутэмын луозы», — ивортэ Зинаида Рябинина.

Тодэ вайытом, Финн-угор калыкъёслэн 7-тӥез дунневыл конгрессы Финляндиысь Лахти карын 15–17 инвожое ужалоз. Форуме 21 делегация пыриське. 15-тӥ инвожое конгрессэз усьтӥз Финляндилэн азьмуртэз Саули Нийнистё. Форуме люкаськемъёслы пумитан кылъёсын озьы ик вазиськизы Венгрилэн но Эстонилэн азьмуртъёссы. Россиысь азьмуртлэсь Владимир Путинлэсь пумитан кылъёссэ лыдӟиз Россиысь лулчеберетъя министрлэн воштӥсез Александр Журавский.

Конгрессын финн-угор калыкъёслэсь кылъёссэс но лулчеберетсэс утёнэн но азинтонэн, выжы калыкъёслэн но ӧжыт лыдъем калыкъёслэн эрикрадъёсынызы герӟаськем ужпумъёсты эскерозы.